Irina, ura, gatza...Ogia!!

Panettone

2012-01-18T19:05:00.011+01:00

Lagun bati dedikatua. Zorionak Garrooo!!! ;)

Nire lehenengo panettoneak. Pluralean bai, sarrera honetan azaltzen diren neurriekin hiru ateratzen baitira.

Oso pozik nago dastatzaile guztiak (25 inguru) mundiala dagoela esan dutelako, bainaaaa ..... beti daukat "baina"-ren bat.

Zapore aldetik ez daukat inungo kexarik, baina ehundurarekin bai.

Gasteizko Artepan-en erosita, 2010-garren urtean nire bizitzako lehenengo panettonea dastatu nuen. Haren ehundura askoz gehiago gustatu zitzaidan, eta horren bila jarraitzeko asmoa dut.

Bonsfocs blogeko Mònicak egindako errezeta jarraitu dut.

Errezetak jarraitzerakoan beti zalantza berdinak izaten ditut. Berak erabilitako irinak, zein indar izango zuen? Zer da ur epela? Zenbat gradu zituen giro-tenperaturak? eta halako galdera ugari. Galderei erantzuna ematea gustatzen zait, eta hauxe, nire lehenengo erantzuna.

Prozesuak 62 ordu inguru iraundu zuen eta prozesu osoa 26ºtan egin zuten.

Ama oreak lau elikadura daramatza:

Ama orea 50 gr.
Indar irina, 100 gr.
Ur epela (30º inguruan), 50 gr.

4 ordu pasa ondoren:

Ama orea 100 gr.
Indar irina 100 gr.
Ur epela (30º inguruan), 50 gr.

Trapu bat irineztatu, ama orea bertan sartu eta soka batekin ondo lotu. 12 ordu pasa ondoren:

Ama orea 50 gr.
Indar irina, 100 gr.
Ur epela (30º inguruan), 50 gr.

4 ordu pasa ondoren:

Ama orea, 56 gr.
Indar irina, 113 gr.
Ur epela (30º inguruan), 56 gr.

4 ordu pasa ondoren, lehenengo oraketa egin:

Indar irina, 625 gr.
Ur epela (30º inguruan), 200 gr.
Esne epela (30º inguruan), 50 gr.
4 arrautza "M".
Ama orea, 225 gr.
Azukrea, 130 gr.
Gurina zatituta eta giro-tenperaturan bigundua, 140 gr.

Bol baten arrautzak, ura ta esnea ondo irabiatu. Ama orea gehitu eta pixkanaka pixkanaka irina gehitzen joan ore homogeneo eta pikor gabekoa lortu arte. Azukrea gehitu eta oratzen jarraitu guztiz integratuta egon arte. Apurka apurka gurina bota eta oratu ore fina, distiratsua eta elastikoa lortu arte. Mintz froga pasatzen badu, momentu ezin hobean dagoenaren seinalea da.

Lehenengo fermentazioa emango diogu tamaina bikoiztu arte. Kasu honetan 12 ordu inguru.

Ondoren, bigarren oraketa:

Lehenengo oraketaren, orea.
Indar irina, 325 gr.
Esne epela (30º inguruan), 80 gr.
Gatza, 10 gr.
Eztia, 10 gr.
2 arrautza "M".
Banilla zorro baten haziak.
Azukrea, 50 gr.
Gurina zatituta eta giro-tenperaturan bigundua, 140 gr.
"Sultana" mahaspasa, 250 gr.
Laranja azal konfitatua, 250 gr.

Banilla haziak irinara bota, nahastu. Apurka apurka irina botatzen joan -ore sikua izango da, *esnea eta arrautzak pixkanaka pixkanaka gehitu eta oratzen jarraitu orea ondo hidratatu arte. Azukrea gehitu eta ondo integratu arte oratzen jarraitu. Gurina gehitzen joan, eta oratu ore fina, distiratsua eta elastikoa lortu arte.

Kontu handiz mahaspasak eta laranja azalak gehitu, eta orea apurtu barik, frutak ondo banatuta egon arte oratu. Boleatu eta 45 minutu egonean utzi.

Orea hiru zatitan moztu eta berriz ere boleatu. Moldetan sartu eta fermentatzen utzi ertzera ailegatzeko **bi atzamar faltatzen zaizkionerarte. Kasu honetan 24 ordu inguru.

Labea 190ºtara martxan ipini. Tenperaturara ailegatzen den bitartean, orearen goikaldean gurutze forma mozketa eman, gurina jarri eta itxi.

Labean sartu, eta 45 minututan egina dago. Labetik atera bezain pronto, moldearen behekaldean bi galtzorratz sartu eta buruz behera hozten utzi.

Benetan mundiala!!!

Eta orain, nire ustez, egindako hankasartzeak.

*esnea dena batera bota nion, eta ondo integratzea asko kostatu zitzaidan, asko. Momentu horretan, oreak izugarri "sufritu" zuen.
** "bi atzamar faltatzen zaizkionerarte", ez zan ailegatu eta nire ustez inoiz ez zan ailegatuko. Beharbada, honetan, lehengo hankasartzeak zer ikusia izan zuen.

Arrautzen neurriarekin ere nire zalantzak ditut. "M" erabili nituen baina hurrengoan ziur aski, "M" eta "L" erabiliko ditut, baina kasu honetan oratuz ahala ikusiko dut.

Hirurak desagertu dira. Gehiago egiteko osagaiak baditut beraz, edozein egunean, ehundura hobetzeko asmoz martxan jarriko naiz. Egun hauetan Teba eta biok panettonearen buruz berba egiten egon gara eta ziur nago zeozer lortuko dugula. Aber zuertea dugun, kontauko dizuegu.

Muxu bat.

Bonpain (%100) arabarra.

2012-01-16T23:50:00.009+01:00

Eibarko kontsumo kooperatibako partaidea naiz. Bertan kontsumitzen dugun guztia ekologikoa da, eta era guztietako jendea gabiltza. Euren artean Biolur-eko teknikari bat.

Behin, ogia gora ta behera hasi ginan. Orduan, ogia egiten nuela enteratu zan eta errota txiki bat nuela ere.

-Alea edo irina erosten duzu? Non? galdetu zidan

-Biak, normalean interneten bidez Albacetetik ekartzen ditut. Hemengoa kontsumitzea nahiko nuke baina ez dakit norbaitek ekoizten duen, esan nion.

-Ui, ba nik ezagutzen dut ekoizle bat. Adolfo du izena eta Heredia-koa da, alea saltzen du, baina errota baldin baduzu ez daukazu problemarik.

Adolforen telefono zenbakia eman zidan. Deitu nion, eta duela urtebete inguru bertatik pasa nintzan. Berba dezente egin genuen eta ale kilo batzuk ekarri nituen, Bonpain garia hain zuzen ere. Pare bat kilo Tebari pasatu nizkion, eta beste hainbeste hor zeunden, etxeko izkina baten erdi ahaztuta. Probatzeko gogoa neukan ....

Larunbatean errota martxan ipini nuen, dena ehotu eta %78-ko erauzketa egin nion. Irina prest.

Ama orea hozkailutik atera, 10gr. hartu, eta elikatzen hasi nuen. Bi bider elikatu eta domekan, goizeko 8:00etan, prest neukan.

Osagaiak:

Arabako Bonpain irin ekologikoa, 600 gr. (100 gr. ama orean)
Ura, 445 gr. (100 gr. ama orean)
Gatza, 12 gr.

Bol baten 500 gr. irin jarri nituen, 275 gr. ur eta 200 gr. ama ore.

Nahasketarekin hasi bezain pronto ur gehiago behar zuela ikusi nuen. Beste 25 gr. gehitu nizkion eta berehala gehiago zurrupatuko zuela konturatu nintzan. Pixkanaka pixkanaka gehitzen joan nintzan 345 gr.-ra ailegatu arte. Beharbada pixkat gehiago ere onartuko zuen, baina momentu horretan zeukan ehundura gustatu zitzaidan eta ez nion gehiago bota.

Ordu erdiko autolisia eman, gatza gehitu eta oratu. Errez oratu nuen, pixkat itsatsen zan baina ez zidan arazo haundirik eman. Ondoren, olioztutako bol baten sartu eta estali.

Lehenengo hartzidura, 21ºtan, hiru ordukoa eman nion, ordubetero tolesdura bat emanez. Boletik atera, boleatu eta 10 minutuko atsedenaldia eman erlaxatzeko. Ondoren, formatu eta banetoian sartu bigarren hartzidura (21º) egiteko.

Ordubete pasa ondoren labea 250ºtan martxan ipini, beheko partean lurruna sortzeko ontzi bat jarriz. Tenperaturara ailegatzen denean, orea banetoitik atera, taxuak eman, labean sartu, lurruna sortu eta 40-45 minututan egina dago. Hasieran 250-225ºtara eduki eta azkenengo 20 minututan 200ºtara jaitsi.

Nahiko indartsua iruditu zait, eta kontutan izanda -"Bonpain"- ogi ona esatea nahi duela baaa, atera kontuak.

Gaur, mozketa eman, eta hori da atera zaigun mamia. Lehenengo aldiz frogatzen genuela, eta zaporea gustatu zaigu.

Kiloa pasatxo geratzen zait, laster Herediatik buelta bat eman beharko dut.

On egiinnn!!!

Muxu bat.

Errege erroskoa (prefermentoarekin)

2012-01-06T19:49:00.011+01:00

Aspaldi ezer argitaratu barik eta gaur, errezeta hau argitaratzeko egun aproposena iruditu zait ;)

Ama orearekin eginda neukan, baina oraingoan zerbait azkarragoa (ikastaroa) behar genuenez, legami freskoa erabili genuen.

Froga goxo batzuen ondoren, hemen gaurko emaitza.

Prefermentoa egiteko osagaiak:

Harimsa markako indar irina 90 gr.
Legami freskoa 2 gr.
Esne erdigaingabetua 55 gr.

Infusioa egiteko osagaiak:

Esne erdigaingabetua 65 gr.
Limoi eta laranja azal zatiak.
Kanela-zotza zatitxo bat.
Azahar 15 gr.
Ron 25 gr.

Orea egiteko osagaiak:

Harimsa markako indar irina 260 gr.
Legami freskoa 8 gr.
Prefermentoa
2 arrautz "M"
Azukrea 75 gr. beteta zihoalako, bestela 100 gr.
Infusioa 50 gr.
Laranja eta limoi azal birrindua
Gurina 70 gr.
Gatz pittin bat.

Apaintzeko:

Arrautza bat orea margotzeko.
Fruta antzigartuak.
Almendrak ...
... edo, nahi dan guztia.

Nola egin prefermentoa:

Bol baten irina ipini.
Legami freskoa gehitu eta irinaren laguntzaz desegin.
Esnea bota eta pixka bat oratu.

Egin ondoren, giro tenperaturan (18/20ºtan) bost ordu eta erdi egon da.

Nola egin infusioa:

Lapiko txiki baten esnea, kanela-zotza eta zitrikoen azalak irakiten ipini, baztertu.
Epeltzen denean ron eta azahar gehitu eta gorde.

Nola egin orea:

Bol baten irina, legamia, prefermentoa, arrautzak, zitrikoen azal birrinduak eta infusioa (50 gr.) ipini eta ondo nahastu.
Ondoren azukrea gehitu eta oratu pixkat dena ondo integratu arte.
Gurina eta gatza gehitu eta frantses teknika erabiliz ondo oratu (ordu erdi inguru).

Olioztatutako bol baten sartu eta estali.

Lehenengo hartzidura, 26ºtan, ordu eta erdikoa egin du.

Ondoren boletik atera, gasgabetu, boleatu eta 10/15 minututako atsedenaldia eman.

Nola formatu:

Atzamarrak ondo irineztatu, eta orearen erdi erdian eta goitik behera bi atzamar sartu.
Atzamarrak biratuz zuloa geroz eta handiagoa egin.
Ahal denean esku osoa sartu, orea airean jaso eta bi eskuekin bueltak emanez nahi den neurriraino zabaldu.
Labeko paperaren gainean ipini eta arrautzarekin margotu.

Bigarren hartzidura, 26ºtan, ordu eta erdikoa egin du.

Labea 220ºtara piztu eta tenperatura hortara heltzen ari denean orea margotu, apaindu, labera sartu, tenperatura 200ºtara jaitsi eta 17 minutu inguruan egina dago. Egina dagoen edo ez jakiteko, galtzorratz bat sartu eta garbi ateratzen bada, egina dago.

Normalean ez dugu betetzen baina gaur loibak horrela eskatuta, esne-gain harrotuaz bete dut. Ona zegoen, oso ona. Zegoen, bai.

Muxu bat.

Ama ore desberdina II (Juan Luis-entzat)

2011-09-26T09:15:00.004+02:00

Hemen duzuen ogia, honen berdina da.

Taxua desberdina, artaziekin eginda. Hortik punta zorrotz hoiek.

Eta orduan? pentsatuko duzue.

Ba, gauza bat bai duela desberdina, garrantzi haundikoa gainera esango nuke.

Hasteko, aurrekoan bezala, pasa zen ostegunean ama ore desberdina (aurre-hartzigarria?) egin nuen. Goizeko 07:00etan prestatu, sukaldeko mahai gainean utzi eta lau ordura hozkailuan sartu nuen.

Eta nun dago desberdintasuna? baaa, denboran.

Ama orea prestatu nuenetik, ogia egin arteee ......... 74 ordu t´erdi pasa zirela. Hiru egun pasatxo eta emaitza hor dago. Nire ustez, oso erosoa eta kriston autonomia eman dezakena, estuasunak amaitu dira ;).

Zuei, zer iruditzen zaizue?

Atzo, sarrera hau prestatzen nengoela albiste txar bat jaso genuen. Deportiboko lagun bat, mendi istripu baten ondorioz hil zitzaigun.

Sarrera hau, hiri dedikatua Juan Luis.

Animo!!! Mertxe, Ziortza, Ehari, ....

Muxu bana.

Ama ore desberdina.

2011-07-22T11:00:00.013+02:00

Ogiaren munduan hasi nintzenetik bisita dexente egin ditut. Errotak ikustera, okindegiak, proiektuak eta abar. Okin askori ama orea erabiltzen dutela entzun izan diet, baina beti, zalantzak izan ditut. Gabon garaian okindegi hoietariko bat bisitatzera joan ginan, bertan, oso garbi ikusi nuen eurek (gehienak) erabiltzen duten ama orea nolakoa den eta orduan probatzeko gogoa sartu zitzaidan.

Gaurko ogia sistema horrekin egindakoa da. Ez da lehenengo aldiz legamia erabiltzen dudala. Behin, ogi bat egin nuen eta Elgetan emandako ikastarorako froga batzuk ere. Ordutik erabili barik neukan lagatzen duen zaporea ez zaidalako gustatzen, eta hori, kantitate gutxi erabilita. Bainaaaa, gabonetatik (bisita ondoren) nire buruan zerbait amaitu barik izango banu bezala somatzen nuen. Pasa zen astian, froga bat egiteko legami freskoa erosi nuen eta hemen emaitza.

Osagaiak guztira:

"Los Pisones" irin txuri ekologikoa, 345 gr.
Semola irina, 255 gr.
Ura, 400 gr.
Gatza, 13 gr.
Legami freskoa, 2 gr.

Prozesuak ordu batzuk (dexente) behar ditu. Nik horrela egin nuen.

Bezperan bol baten, irin txuritik 200 gr. jarri nituen, ura beste hain beste, eta legamia. Nahastu, estali, eta 25-26ºtan bost ordu laga nuen bikoiztu arte. Ondoren, hozkailuan sartu eta hamabi ordu izan nuen. Ordu hoiek pasatu ondoren, hozkailutik atera, eta ordu eta erdi inguru giro-tenperaturan euki nuen.

Beste bol baten geratzen zitzaidana nahastu nuen, hau da, irin txuria 145 gr., semola irina 255 gr., ura 200 gr. eta gatza. Nahasketa horri, bezperan egindakoa gehitu nion. Mahai gainera atera eta 10 minutu inguru oratu nuen, beti atsedenaldiak emanez. Olioztatutako bol baten sartu eta 2 orduko hartzidura eman nion, atera, tolesdura antzeko bi edo hiru eman ondoren formatu eta banetoira sartu nuen. Beste ordubete eta erdiko hartzidura egin ondoren, aurrez berotutako (260º) labean sartu eta 50 minututan eginda zegoen. Lehenengo ordu laurdena 250-225º artean eta amaitu arte 225-190ºtara.

Emaitza, legamiarekin zuzenean egindakoa baino askoz gehiago gustatu zait, bainaaaa duda barik, nire ama oreaz egindako ogiekin geratzen naiz. Zalantza barik sistema hau gehiagotan erabili dut, kriston *indarra duelako. Gehien bat ogi goxoak, roskoiak eta halakoak egiteko.

*Begiratu Karapaixoak daraman legami kantitatea eta gaurkoak daramana, alde txiki bat badago ez?

Oharra.- Hozkailutik atera nuenean susto txiki bat izan nuen, zentimetro eta erdi jaitsita zegoen eta zalantzak izan nituen. Joe, igual denbora larregi izan dut pentsatu nuen, baina behin hasita, aurrera ez? eta hor dago emaitza, beraz, lasai egon.

Muxu bat.

Kukutza

2011-07-19T23:03:00.003+02:00

Normalean eskaintzak sarreraren bukaeran jartzen ditut baina gaurkoa hasieratik doa.

Sarritan, gauza batzuk entzuten ditugu baina hor geratzen dira, gure barnean baina hor, erdi ahaztuta. Gaurko kasua ere hor zegoen, nonbait aparkatuta, ahaztuta, baina gaur zortzi korreo bat heldu zitzaidan. Bertan, bideo baten lotura zetorkidan, zabaldu eta 10:15 minutuak pasatu ondoren zeharo hunkituta nengoen.

Ez naiz gaztetxeetan asko dabilen pertsona bat, baina bai euren gauza gehienekin bat datorren pertsona. Esan bezala Kukutza izena aspaldi entzunda nuen baina hor ahaztuta ere, eta ez nekien zertan zenbiltzaten.

Eta zuek, ba al dakizue zein gauza egiten dituzten?

Ez dakizuela? ba ikusi hau. Eta hemen, Kukutza Gaztetxearen proiektuen berri.

Atzo ogia labekatzen nengoela, berriz ere, Kukutza etorri zitzaidan burura. Ogia labe barruan nola hasten zela ikusi nuenean zera pentsatu nuen, nire ogiek euren proiektuak bezala, pixkanaka pixkanaka, goruntz doazela.

Eta hori da lurrera botatzea nahi dutena?

Osagaiak:

"Los Pisones" galirin txuri ekologikoa, 425 gr.
"Rincon del Segura" zekale integrala ekologikoa, 75 gr.
Zekalezko ama orea (%166ko hidratazioa), 200 gr.
Ura, 255 gr.
Gatza, 12 gr.
Estia, 14 gr.
Mahaspasak, 100 gr.
Intxaurrak, 100 gr.

Mahaspasak eta intxaurrak ezik beste osagai guztiak nahastu. Ordu erdi laga egonean. 6-8 minutu jarraian oratu nuen eta ondoren fruitu lehorrak sartu nizkion. Lehenengo hartzidura hiru ordukoa eman nion, bi tolesdura barne. Boleatu, 10 minutu inguru erlaxatzen laga, formatu, bi orduko bigarren hartzidura eta labekatu. Lehenengo ordu laurdena 250-225ºtara, eta beste 35 minutu inguru 200-180ºtara.

Gaur, mokadu bat eman diot eta asko gustatu zait. Oso goxoa!!! euren bideoa eta proiektuak bezalaxe. Egiten duten garagardoarekin, barazki jantokian jateko, primerakoa.

Kukutza ikutu bez.

Muxu bat eta mila esker, Kukutza.

Eibarko (okin?) kuadrila batek egindakoak.

2011-06-23T09:00:00.001+02:00

Martitzenean, ekainak 21ean, arratsaldeko 15:00etan, Eibarko zortzi okin? elkartu ginan ogia egiteko asmoarekin. Gehienentzat ogiarekin lehenengo kontaktoa izan zen, baina ez zitzaien hain gaizki joan, ezta? Hiru argazki falta zaizkigu, baina nire ustez hoiek ez ditugu inoiz jasoko, honezkero ogia janda egongo delako.

Hor, emaitzak.

Zer iruditzen zaizkizue?

Hurrengoa, irailean. Eta baliteke beste norbaiten beharra/laguntza izatea ;)

Kontaukotzuet.

Zahiarentzat irtenbide bat.

2011-06-08T21:28:00.013+02:00

Zerealak etxean ehotzen ditudanetik, zahi dexente pilatzen ari zait eta irtenbide bat bilatu behar nion.

Eta zein da irtenbide hori? Ba argazkian ikusten dena, ogi kirrikatsua.

Suedian oso tipikoa omen da eta Knäckebrod du izena.

Ez nekien nola egin eta interneten buelta batzuk eman ondoren pot-pourri bat egitea erabaki nuen, oinarri bezala hau erabiliz eta kanpo aldetik ikusten duzuen txuri hori zahia da.

Osagaiak:

100 gr. galirin integrala.
100 gr. zekale integrala.
100 gr. zekale txuria.
100 gr. ama ore integrala.
150 gr. ur.
6 gr. gatz.
5 gr. txarpoil (alcaravea)
Zahia

Katilu baten osagai guztiak nahastu, mahai gainera atera eta oratu (gutxi) ore leun bat lortu arte.

Olioztatutako katilu baten sartu, estali eta ordu bete inguru laga. Ondoren, labea (250º) martxan jarri. Mahai gainera zahia bota, orea atera eta arrabol batekin zabaldu 2-3 milimetroko lodiera lortu arte. Guztiz zabalik duzuenean, gainetik ere zahia bota, arrabolarekin pasatu, mozketak eman eta sardexka batekin zulotxoak egin. Labean sartu nituenean tenperatura 250ºkoa zan, baina hortik aurrera ezin dizuet esan termometroarekin istripu bat izan nuelako.

Interneten, 6-8 minutu edukitzeko jartzen zuen baina bigunak zeunden eta horregatik denbora luzatzen joan nintzan tente samar zeundela ikusi arte. Azkenean hogei minutu inguru egon ziren.

Ez dakit nolakoak izan behar diren, ideiarik ere ez, baina gustatu zaizkit. Batzuk, lanera eraman nituen eta han ere asko gustatu zitzaizkien. Besteak, Castelló-ra eramateko ziran baina azkenengo momentuan ezusteko larri bat izan dugu eta ezin izan ditugu eraman. Geratzen zirenak gurekin joateko zan batek eraman ditu, ea horrek zer esaten digun.

Muxu bat.

bigarrena ...

2011-06-06T23:28:00.007+02:00

Amaiaren bigarrena.
Osagaien neurriak, okinaren portzentaia aplikatuz. Kiloko orea.
Frantses teknika erabiliz oratua. Hiru tolesdura (bideoa). Lehenengo hartzidura (21º), hiru ordukoa. Bigarren hartzidura (7 ordu inguru) hozkailuan egin zuen. Labekatu; hasierako minutuak (25 inguru) 270-225ºtara gutxi gorabehera. Azkenengo minutuak (15 inguru) 225-185ºtara gutxi gorabehera.
Hitz batez, ogi tailerretan bezala eginikoa, berdin berdin.
Osagaiak:

256 gr. irin txuri ekologikoa (Los Pisones).
250 gr. irin txuri ekologikoa (Rincon del Segura).
214 gr. ama ore txuria (%100)
280 gr. ur.
13 gr. gatz.

Frantses teknikarekin, hasiera baten, zailtazunak izan zituen. Bueno, zailtazunak baino gehiago prisa larregi. Atsedenaldietan, aholko batzuk eman, eta azkenean nahiko ondo menperatu zuen.
Beste pausu guztiak nahiko errez egin zituen, forma eman barne.

Igandean egin, astelehenean dastatu eta mundiala dago. Azido puntu goxoa du, oso goxoa.

Muxu bat.

Amaiaren lehenengoa ...

2011-05-15T19:32:00.013+02:00

Oharra.- Orain bai. Behealdean, mamiaren argazkia duzue.

Amaiak (neskalaguna) ogiarekin hasi nintzenetik gauza askotan lagundu nau.

Sarritan telefonoa hartu eta:

Amaia, mahai gainean dagoen ama orea elikatu mesedez. Ura bota, nahastu. Irina bota ... eta blablabla.
Amaia, hozkailuan dagoen orea atera, labea martxan ipini eta hainbat gradutara heltzen denean orea sartu. Egon egon, baina lehenago taxua eman mesedez. Horrela ematen zaio ... eta blablabla.

Ez dut gogoratzen ondo, baina duela egun batzuk ogi bat egin behar zuela komentatu genuen.

Moldeko ogia bukatzen zegoela eta hasteko, moldekoa ez zala txarra izango esan nion.

Atzo, larunbata, arratsaldeko 15:00etan zekalezko ama orea martxan (20º) jarri nuen. Konpromiso batera joan, kalean afaldu eta gaueko 00:30 inguruan etxean sartu, elikatu eta berriro ere martxan (25º). Gaur goizeko 8:45etan ogiaren prozesuarekin hasi dugu.

Osagaiak:

200 gr. irin txuri ekologikoa (Los Pisones).
100 gr. irin integral ekologikoa (Rincon del Segura).
75 gr. zekalezko irin txuria (RdS).
75 gr. jorasan irina.
75 gr. artobeltza.
10 gr. malta irina.
210 gr. zekalezko ama ore integrala.
275 gr. ur.
25 gr. ekilore-olioa.
30 gr. olo malutak.
15 gr. liho haziak.
15 gr. olo haziak.
15 gr. garagar haziak.
5 gr. txarpoil (alcaravea).
13 gr. gatz.

Prozesua, ogi honen antzekoa izan du.

Desberdintasunak:

Lehenengo hartzidura bi ordukoa izan beharrean, hirukoa izan du, giro-tenperatura baxuagoa zegoelako.
Bigarren hartzidura, zazpi ordukoa, hozkailuan egin du. Orea nahiko hotza zegoenez, labean 200ºtara ia hirurogeita hamar minutukoa izan du.

Oraketa dexente kostatu zaio orea oso itsaskorra zegoelako, baina azkenean olioaren laguntzaz lortu du. Beste pausu guztietan oso ondo moldatu da.

Emaitza polita, ez?

Bueno, ba hor duzue mamiaren argazkia. Gaur goizean egin diogu lehenengo mozketa eta suposatzen nuen moduan mamia ere primeran dago.

Lehenengoa da, eta azkena ez izatea espero dut.

Zorionak, guapetonaaa.

Muxu haundi bat.

Suediako arrantzalen ogia

2011-04-27T00:06:00.002+02:00

Gogoa nion. Moldea aspaldi erosita nuen baina betikoa, alferkeria, utzikeria, .... zeinek daki.

Sarri, zerbait egiteko aitzaki baten beharra izaten dut, eta kasuan, gauza bera gertatu zait.

Ogi hau Dan Lepard-en liburuan "zekalezko ogi goxoa" izenarekin azaltzen da, baina izena aldatu diot. Zergatik? Arrantzaleen lana izugarri gogorra iruditu eta ogi honek duen istorioa gustatzen zaidalako. Ez dakit egia den edo ez, baina bitxia bai dela behintzat.

Diotenez, Suedian, arrantzaleak denbora luzerako itsasora (Báltico) ateratzen zirenean ogi hau eramaten omen zuten. Itsasoaren baldintzak kontutan zituzten eta horregatik du azala hain beltza, ogia babesteko hain zuzen ere. Jaterakoan, azala kendu, eta barrukoa jaten zuten, azal beltz horri esker mamia bigun mantentzen zelako.

Ez al zaizue xelebrea iruditzen?

NOLA EGIN?

Bezperan edo ordu batzuk (8-10) lehenago beratzen ipini:

240 gr. ura irakiten
50 gr. zekale irin txuria

Aukerako espeziak:

Cardamomo hiru lekaren hazi ehotuak.
Anis berdearen haziak, koilaratxokada bat.
Laranja baten birrindura.

Orearen osagaiak:

200 gr. zekalezko ama orea.
140 gr. ezti.
50 gr. ur 20ºtara.
290 gr. bezperan beratzen jarritakoa.
300 gr. zekale irin txuria.
Itsas gatz fina, koilaratxokada bat.

Lehenengo, bezperako nahasketarekin hasiko gara. Horretarako ura irakiten jarri, eta tenperatura 80ºtara jaisten denean, pixkanaka pixkanaka eta pikorrik ez sortzeko ondo irabiatuz, irina gehituko diogu. Estali eta pausatzen laga 8-10 ordu.

Orea egiteko ama orea, ura, eztia eta bezperako nahasketa ondo irabiatu. Irina eta gatza gehitu eta irabiatu berriz ere, ore lodi eta homogeneoa lortu arte. Zekaleak ez du gluten malgua, itsaskorra baizik, eta ez du merezi oratzerik. Espeziak gehitzeko asmoa badugu, orain da momentua. Moldea olioztatu, orea bertara bota, eta espatula busti batekin leundu. Estali eta 25ºko toki baten, 5-6 ordu laga hartzidura egin dezan.

Labea 200ºtara berotzen jarri. Moldearen tamainua duen aluminiozko paper bat olioztatu eta moldera ondo egokituz, estali. Ordu eta erdi labekatu, aluminiozko papera kendu, eta beste ordu bete labekatu azala ondo ilundu arte. Parrila baten gainean ipini, hotza dagoenean moldetik atera, eta olioztatutako landare-paperarekin bildu. Horrela 48 orduz laga etaaa .... on egin.

Goxoa, benetan ... eta erreza, oso erreza.

Zein izan ote da, oraingoan, ni martxan ipintzeko aitzakia? Baaa, bi (edo hiru?) urtebetetze.

Norenak? Bata, kuadrilako batzuen alabarena. Astelehenean, 15 urte bete zituen. Ondotxo dakit zein den eguna, ikastolan lanean hasi nintzen egun berean jaio bait zen. Joooer!! gogoratzen dudala.

Besteak, gaur bertan betetzen ditu. Ogiak lagun asko eman dizkit, baina dudarik gabe hau haundiena eta bereziena da, bai horixe!!!

Bati, badakit gustatu zaiola. Besteak, gaizki ez badoa behintzat gaur bertan jasoko du, eta berari ere gustatzea espero dut.

Zorionak, Jone eta Teba.

Un bico para cada unha dende Galicia, guapetonaasss.

Okinaren portzentaia

2011-04-06T19:57:00.015+02:00

Hemen ikusiko duguna nahiz eta hasiera baten oso zaila iruditu, behin ulertuta, ogia egiteko oso lagungarria egingo zaigu. Beti irin berdinak edo antzekoak erabiltzen baditugu, ogien hidratazioak ezagututa, ezinbestekoa dela esan dezakegu.

Ogi desberdinen hidratazioak:

Gaztelako ogia; %50-55
Barrak eta ogi basikoa; %60-65
Ogi errustikoa (baserrikoa); %65-68
Ciabatta, focaccia, pain a l´ancienne,.... %70 gora

Kontutan izan behar dugu formula honekin irina beti %100a izango dela eta osagaien pisua irinaren neurriaren arabera kalkulatuko dugula.

Lehenengo, zein ogi (hidratazioaren arabera) nahi dugun pentsatu behar dugu, ondoren, oreak zein pisu izatea nahi dugun eta horrekin, bai irinaren pisua eta bai urarena aterako ditugu.

Adibide honetan, ogi erreza (%63ko hidratazioa) eta orea kilokoa izango dira.

Gatza ez dugu kontutan hartuko kantitatea oso txikia delako (13gr.)

Irina; unitatea izango denez, 1 izango da.

Ura; %63koa izango denez, 0,63 izango da.

Bihak gehitzen baditugu; 1+0,63= 1,63 ateratzen zaigu.

Orea; kilokoa (1000gr.) izatea erabaki dugu.

Portzentaiak ateratzeko formula:

1000:1, 63= 613gr. irina (%100) eta orearen neurrira ailegatzeko beste guztia ura izango da, beraz,
1000-613= 387gr. ura (%63)

Hauek dira gaurko *adibidean erabiliko ditugun osagaien neurri osoak.

Gaurko adibidearen osagaiak dira, baina legamia (kasuan, ama orea) falta zaigu eta bertatik atera beharko dugu.

Ama orea egiteko erabiltzen dugun neurria normalean %35 inguruan dabil eta adibidean ere neurri bera erabiliko dugu. Gure ama orearen hidratazioa %100 da, beraz, irinak eta urak neurri bera dute.

Irinaren pisua (613gr.) kontuak egiteko oinarria denez, eta kontutan izanda ama orean irinak eta urak neurri bera dutela, ateratzen zaigun emaitza bitan zatituko dugu.

Ama orearen neurriak ateratzeko, formula:

613x35:100= 214gr. ama ore, guztira.
214:2= 107gr. irina eta beste hainbeste ura.

Honek, ama orea egiteko bai irinari bai urari 107gr. kenduko dizkiegula esatea nahi du.

Beraz errezeta horrela geratu zaigu:

Irina, 506gr.
Ura, 280gr.
Gatza, 13gr.
Ama orea, 214gr.

Ama orea erabili beharrean legami freskoa erabiltzea pentsatzen badugu, *adibide bera izango litzateke baina irinari eta urari ezer kendu barik.

Irina, 613gr.
Ura, 387gr.
Gatza, 13gr.
Legami freskoa 12gr. Legami sikua bada, beti freskoaren herena, kasuan, 4gr.

Errezeta horrela ikusten badugu, eta uraren portzentaia zein den jakitzea nahi izan ezkero, hauxe izango litzateke formula:

387:613= 0,63. Hor, uraren portzentaia.

Txakinarto eta gari ogia

2011-02-20T09:41:00.014+01:00

Bueno, ba sarrera honekin Luis Azillonari omenaldi xume bat egitea nahiko nioke eta bide batez nire mirespena azaldu.

Pertsona bategaz gauza asko entzuten dituzu (egiak, gezurrak?) baina ezagutzea beste gauza bat izaten da. Kasu honetan entzundako guztia egia zan, baina nire ustez orain arte entzundakoa ez zen bere neurrira ailegatzen.

Txakinartoa zer den jakiteko berarekin egotea ezinbestekoa da. Gauza asko irakurri daitezke, entzun ere, baina bera da horren gainean gehien dakien pertsona, dudarik gabe. Eta oso argi daukat gauza bat, txakinartoa gure artean badago berari esker dela, bere bizitzako ordu eta ordu asko horretan eman dituelako, eta emango dituenak.

Joee!!! bere etxean jandako taloa ez dauka izenik. Horrek bai merezi dituela izar batzuk.

Eta ogi hau, hemen duzuena, berari esker da.

Osagaiak:

150 gr. galirin txuri ekologikoa (RdS)

150 gr. galirin txuri ekologikoa (Los pisones)

200 gr. txakinartoa

220 gr. ama ore txuria (%100)

390 gr. ura (%82)

13 gr. gatza

Lehenengo aldiz egiten nuela eta ez nuen nahi arrieskatzerik, beraz ogi honek ez dauka misterio haundirik. Gehienak bezala egin dut.

Gatza ezik, beste osagai guztiak nahastu, autolisia, gatza gehitu eta oratu. Eskuetan lagatzen duen usaina flipantea, itzela!!! 1. hartzidura, tolesdurak, formatu, 2. hartzidura eta labekatu, besterik ez.

Honi, hirugarren tolesdura ematea kostatu zitzaidan orea oso oso indartsu zegoelako. Orea sartu nuenean labea 270ºtan zegoen.

Hurrengoan, (ez du behar) ur gehiago botako diot onartzen duelako, txakinarto gehiago ere.

Gomendio bat; ahal baduzue bisitatzera joan, ziur nago ez zaretela damutuko, ezta gutxiago ere.

Mila esker, Luis eta familia.

Gorputz txuria, bihotz beltza.

2011-02-15T19:49:00.001+01:00

Ogi hau halakoa da.

Azkenengo tailerrean sobratutako bi irinen nahasketa neukan eta aprobetxatu beharra zegoen.

Bi irin txuri ekologikoak, hortik gorputz txuriarena. Eurekin batera ama ore integrala erabili nuen, hemendik bihotz beltzarena.

Ogi integralak egiteko normalean ama ore integrala erabiltzen dut, baina gaur arte inoiz irin txuriarekin. Probatxeko momentua zen eta hemen emaitza.

Osagaiak:

250 gr. galirin txuri ekologikoa "Los Pisones".

250 gr. galirin txuri ekologikoa "Rincon del Segura".

230 gr. ama ore integrala.

285 gr. ura.

13 gr. gatza.

Osagai guztiak nahastu, gatza ezik. 30 minutuko autolisia egin, gatza gehitu, nahastu, mahai gainera atera eta oratu. Suabe suabe, gozo gozo, eta prisa barik oratu nuen. 10-12 minutu, tarteka atsedenalditxoak emanez.

Olioztatutako bol baten sartu eta hiru orduko hartzidura eman nion, ordu betero tolesdura bat eginez. Boleatu, 10 minutu erlaxatzen utzi, formatu tentsioa emanez eta bannetoian sartu. Berandu zenez hozkailura sartu nuen.

Handik 12 ordura hozkailutik atera eta labea martxan jarri nuen. 260ºra heldu zenean, ura sutan ipini, orea bannetoitik atera, taxuak eman, labean sartu eta ura irakiten behealdean nuen ontzi batera bota.

Labea amatatu eta tenperatura 200ºra heltzen ari zenean berriz piztu nuen. 15 minutu geroago ontzia atera, eta ordu erdi beranduago ogia egina zegoen. Labea amatatu eta bertan beste hamar minutu inguru laga nuen.

Izozkailuan sartu baino lehenago zati bat jan dugu eta samur samurra dago. Goxoa, redio!!!

Sarrera hau asko maite ditudan pertsona batzuei dedikatzea nahiko nieke, Usurbileko peñari hain zuzen ere.

LeIRe, Jabi, Ikatz ;), Andoni, Aitziber U., Pernando, Aitziber, Jakoba eta beste guztiei. Merezi duzuelako, ke ostias!!!

Mila esker. Muxu bana denontzat.

Bideoak

2011-01-16T15:03:00.003+01:00

Aupaaa.

Ama orea nola egin eta nola elikatu ikusteko, bideoak berriz ere, martxan dituzue.

Bai hemen eta bai irinak eta urunak blogean.

Animatu eta martxan jarriii!!!!!!!!

Urtebete.

2011-01-01T00:01:00.025+01:00

Gaur (Urteberri eguna) irinak eta urunak blogak bere lehenengo urtea betetzen du.

Z O R I O N A K

Gaztainerre eguna

2010-11-15T10:29:00.018+01:00

Aupiiii, lehenengo istoria txiki bat.

Egun hau Eibar, Ermua eta Soraluzen arimaren egunetik bigarren astelehenean ospatzen da.
Aintzinean, familiak etxean ospatzen zuten, sarri, familia bat baino gehiago etxe berean elkartuaz. Gaur egun ordea, lagun arteko afari meriendak eginaz ospatzen da. Afari-merienda hauek herriko tabernetan edo inguruko hauzoetako bentetan egiten dira. Afaria goiz xamar hasten da eta lehenbiziko eta plater nagusitzat marraskiloak saltzan, txorizo errea eta azkenik gaztaina erreak dastatzen datza ohitura. Azpimarragarria da baita ere, orain arte gizonezkoek soilik ospatzen zuten jaia zela.
Gaztainerre zergatik? gaur gure basoetan gaztaina gutti bada ere, aspaldi batean ugaria zen arbola mota hau eta urte garai honetan jakirik ugariena eta merkeena (gaztaina) ematen zuelako batipat.
Uste dugu aintzina orain baino hedakunde haundiagoa izango zuela afari merienda honek. Hemen esan ohi denez, hilketa ondorengo "ondra janak" bezala omen da gaztainerre. Horregatik egiten da dominu santu eta arimen egunaren ondoren.
Eibar, Ermua eta Soraluze herrietako nekazarien artean, eta baita Durangaldekoen artean ere, oraindik bizirik irauten du hileta ondorengo "ondra janak". Ohitura hau kontutan harturik argi dago Gaztainerre egunaren jatorria, dominu santu eta arimen egunak haintzat harturik, urtean behingo anaitasunezko otordua egitea hildako guztien oroimenean dala.

Idatzi hau, J.A. Mogel ikastolako artxibotik jasotakoa duzue.

Zapatuan, Dan Lepard eta Ibanek sinatutako pare bat liburu eramatera joan nintzen. Toki bietan opariak eman zizkidaten, euretariko baten, gaztaina irina eta horregatik gaurko ogi hau.

Gaur Eibarren, gaztainerre eguna ospatzen da eta hauxe duzue, nire aportazioa.

Osagaiak:
300 gr. ogia egiteko galirin zuria.
125 gr. gaztaina irina.
75 gr. galirin integrala. Oraingo honetan etxean ehotua ;)
300 gr. ura.
200 gr. ama ore zuria (%100).
10 gr. eztia.
13 gr. gatza.

Gatza ezik osagai guztiak nahastu, estali eta ordu erdiko autolisia egiten utzi. Ondoren, gatza gehitu, nahastu eta olioztatutako mahai gainera atera. Era tradizionalean oratu eta olioztatutako bol batean sartu. Hartzidura tenperaturaren arabera emango diogu. Kasu honetan (20-22º), hiru ordukoa eman nion, ordubetero tolesdura bat emanez.
Azkenengo tolesdura ondoren, boleatu eta 10 minutu inguru erlaxatzen utzi. Ondoren formatu, bannetoian sartu eta estali. Normalean dena jarraian egiten dut, oraingo honetan, Barakako lagun batzuen bisita izan nuen eta horregatik hozkailuan gorde eta kalera atera nintzen.
Joan zirenean, handik atera eta nahiko igota ikusi nuenez, labea martxan jarri nuen. 250ºtara ailegatu zenean, orea bannetoitik atera, taxuak eman, labera sartu, eta jarraian, lurruna sortzeko beheko partean nuen ontzi batera ura irakiten bota nion. Hamabost minutura, ura atera eta tenperatura 200º jaitsi nuen. Hamabost minutu beranduago 180ºtara jaitsi eta beste hamabost minututan egina zegoen.

Hau da gaztaina irina erabiltzen dudan lehenengo aldia, paketea zabaldu nuenean eta handik ateratzen zen usaina kontutan hartuta ez nion gehiagorik bota. Orain, ogia frogatu ondoren, gehiago onartuko lukeela esan dezaket.

Mila esker Idu eta Xabi.

Muxu bat.

Jorasán and coriander bread.

2010-09-23T14:35:00.018+02:00

Izenburua ingelesez eta hori? pentsatuko duzue. Ez pentsa bapatean ikasi dudala, e? nahiko nuke bainaa .... "translate is magic". Ez nekien nola esan eta horrela egitea bururatu zait. Asteartean ingelesa ikasten hasi nintzen, eta horregatik izenburua hizkuntza hortan, ea zer moduz dihoakidan, uff!!! Oihana, laster (noiz izango ote da) iruzkinak ingelesez jarriko dizkizut ;)

Domekan lagun batzuekin bazkaria neukan eta ogi berri bat egitea pentsatu nuen, gaurko hau hain zuzen ere. Jorasán irina erabilita neukan baina martorria ez, eta ez pentsa nahita jarri niola. Ogia egiten hasi nintzenetik etxea espeziaz beteta daukat, armairua zabaldu eta bolitak ikusi nituenean; hauekin, pentsatu nuen. Ehotu, eta aurrera.

Osagaiak:

250 gr ogia egiteko galirin zuria.
50 gr galirin integrala.
200 gr Jorasán irina.
200 gr ama ore zuria (%100).
302 gr ura.
12 gr gatza.
10 gr martorri hazi ehotuak.

Ogiak ez du misterio haundirik, gehienetan bezala egin nuelako.
Osagai lehorrak katilu baten ipini, likidoak gehitu eta ondo nahastu. Ordu erdiko autolisia egiten utzi, mahai gainera atera eta 10-12 minutuz oratu. Oraingo honetan frantses (bideoa hemen) teknika erabili nuen. Katilura bueltatu eta hiru orduko hartzidura eman nion, ordubetero tolesdura bat eginez. Formatu, bannetoira sartu, eta ordu eta erdiko bigarren hartzidura egiten utzi. Labea 250ºtara berotu, lurruna sortu, oreari taxua eman eta labean sartu. Hamar minutu pasa ondoren 225ºtara jaitsi, eta ordu laurden beranduago 200ºtara. Berrogei minutu pasa ondoren labea itzali, atea erdi ireki eta horrela beste bost minutu inguru laga nuen.

Ogia gustatu zitzaidan. Ez nekien, baina martorriak zitriko ikutua dauka. Niretzat, 10 gr. hoiek neurri polita da, baina lagun bati gogor samarra iruditu zitzaion. Gustoak, badakizue.

Argazkian dagoen taxua nola egin nuen:
Lagun batek taxu hoiek nola egiten ditudan galdetu dit, eta ea denok ulertzeko moduan erantzuten diodan.

Hasteko, taxua eman eta horrekin dena egina dagoela pentsatzea, niretzat errua dela esan beharra daukat. Prozesuaren barruan dagoen beste pauso bat da, besterik ez. Ordurarte zerbait gaizki egin ezkero, ogia, nire ustez ez da nahi bezala zabalduko eta edozein tokitik apurtzeko arriskua dago. Hor ikusten den taxua emateko, etxean egindako tresna bat erabili nuen.

Orea bannetoitik azkenengo momentuan atera eta taxua, orearen gainazalarekiko 25-30 graduko inklinazioarekin orearen alde batetik bestera (0,5 - 1 zm.) sakonduz, eman.

Taxua berak ez du beste misteriorik, baina esan bezala, pauso guztiak garrantsi haundia daukate estetikoki zerbait polita lortzea nahi badugu.

Muxu bat.

Ogia, garagarra eta limoiaz.

2010-09-01T21:00:00.007+02:00

Aupa. Gaurko hau ere Lepard-ena da eta liburu hontatik aterata dago (gehienetan bezala, moldatuta). Oparitu zidatenean ez nuen pentsetan halako etekina aterako nionik bainaaa ... pixkanaka pixkanaka badoa bere fruituak ematen. Ingelesez dago eta ez dut ezer ulertzen, baina oporretan loibekin egon nintzen eta euretariko bat errezeta honen itzulpena egin zidan. Eskerrak!!! lan bat gutxiago.

Lepard-ek olioa, parrilan egindako piperrak, olibada, gazta, edozein urdaiazpiko eta letxugarekin sandwich balitz bezala jatea modu egokiena dela dino. Momentuz bera bakarrik jan dugu eta mundiala dago.

Osagaiak:

200 gr garagar irina.
300 gr ogia egiteko galirin zuria.
200 gr ama ore.
250 gr ur.
60 gr ezti.
30 gr limoi zuku.
6 gr limoi-birrindura (2 limoi).
12 gr gatz.
Orea hautseztatzeko, gatz lodia (ahaztu egin zitzaidan).

Katilu baten irinak eta gatza nahasi. Beste baten ama orea, ura, limoi zukua eta birrindura eta eztia irabiatu. Osagai likidoa beste bolera bota eta nahastu ore leuna lortu arte. Estali eta hamar minututan egonean laga.

Mahai gaina olioztatu, orea bertara atera eta 4/6 minutu inguru oratu. Garagarrak, zekaleak bezala gluten gutxi duenez, gehiago oratzea ez du merezi, ados? Bola forma eman eta olioztatutako katilu baten sartu 1. hartzidura egin dezan. Etxeko sukaldean 22-23º gradu zeunden eta 3 ordukoa eman nion. Ordu betero tolesdura bat egin nion. Azkenengo tolesdura ondoren, bola forma eman eta 15 minutu inguru egonean laga. Forma eman, bannetoian sartu eta ordu eta erdiko hartzidura eman nion.

Labea, 210º-tara berotzen ipini. Behealdean metalezko ontzia jarriko dugu, bertara ura bota eta lurruna sortzeko. Tenperatura hartu duenean, bannetoitik orea atera. Orain izango litzake, orea bustitzeko eta gatz lodia botatzeko momentua (neri ahaztu zitzaidana). Labean laga dugun ontzira ura irakiten bota, oreari alde batetik bestera taxua eman eta labera sartu. Lehenengo ordu erdia pasa ondoren tenperatura 190º-tara jaitsi eta beste hamabost minututan egina dago. Parrilla baten hozten laga.

Lepard-ek, limoi zukuak garagarrari zaporea handiagotu eta zekaleak duen garraztasuna ematen diola dino. Ez dakit horrela den edo ez, nik limoi zaporea hartu diot, baina ez oso bizia, e?

Limoizaleak bazarete egin, oso oso goxoa baitago. Ahoan lagatzen duen limoi tokea, sekulakoa!!

Pare bat ohar.

Bigarren hartziduraren denbora jartzen dudanean, labea berotzen dagoen tartea ere bertan kontabilizatzen dut.
Lurruna sortzeko ura botatzen duzuenean, neurrian botatzen baduzue, ez daukazue ontzia atera beharrik, ados? Atea zabaltzen dugun bakoitzean tenperatura jaitsi egiten zaio, eta ez zaigu batere komeni.

Sarrera hau Nereari (loiba) eskaintzen diot. Mila esker itzulpenagatik.

Muxu bat.

Piperrada pizza

2010-08-26T08:30:00.021+02:00

Asko gustatzen zaidan janaria da. Oporretan hainbat egiten ditut baina gero, urtean zehar, ia ez ditut egiten. Zergatik? uff, zeinek daki!!! Gehien gustatzen zaidana zera da, edozein osagai onartzen dutela. Zalantzarik gabe gustokoenak barazkiak daramatzatenak ditut, besteak ere, baina barazkianaaaak txapeau!!!

Gaurko hau, niretzat, Euskal Herrian plater mitikoa den batekin apaindu dut.

Osagaiak:

170 gr ogia egiteko galirina.
80 gr gari-semola fin fina (semolina?).
100 gr ama ore.
100 gr ur.
30 gr olio.
3 gr azukre.
6 gr gatz.

Katilu baten, irinak, azukrea eta gatza nahasi. Ura eta ama orea gehitu, ondo nahastu. Hamar minutu inguru egonean laga. Mahaira atera eta 7-10 minutu inguru oratu (oso errez oratzen da). Berriz ere katiluan sartu, estali eta hartzidura egiten laga. Tenperaturaren arabera luzeagoa edo motzagoa izango da. Honek, ordu bete eta hiru ordu laurdenekoa egin zuen. Sukaldean 26º inguru zeunden.

Hartzidura egiten duen bitartean piperrada prestatu.

Osagaiak:

Tipula erdia.
Piper gorria.
Piper berdea.
Azenario txiki bat.
Berakatz-ale bat.

Apaintzeko osagaiak:

Piperrada.
Oliba olioa.
Etxean egindako tomatea.
Oliba beltzak.
Mozzarella gazta.

Hartzidura eginda duenean mahaira atera berriz ere. Gasgabetu, bola forma eman eta hamabost minutu inguru laga. Horrela, gero, forma ematea errezagoa egingo zaizue. Forma eman, biribila bada hobe bestela ez da ezer pasatzen. Zabalduta dagoenean olio pixkatekin igurtzi, etxean egindako tomatea, piperrada, oliba beltzak eta mozzarella gaztarekin apaindu.

Aurrez, labea denak emanda berotuta izango dugu. Sartu eta hamar-hamabost minututan egina dago.

Normalean, oregano eta albaka pixkat ere jartzen diet, baina oraingo honetan ahaztu egin zitzaidan eta egia esaten badizuet hemendik aurrera pizza honi behintzat, ez dizkiot ipiniko. Horrela, piperradaren zaporea askoz nabariagoa delako, goi-mailakoa.

Semolina lehenengo aldiz pizza honetan erabili dut eta zin dagizuet hemendik aurrera pizza guztietan erabiliko dudala. Beste ikutu bat ematen dio.

Muxu bat.

Gehigarria.- behialak egindako galdera bati erantzuteko gehigarri hau ipintzea bururatu zait.

Honetan, semolina eta nire harteko maitasun/gorroto istorioa kontatuko dizuet.

Sarean (blog baten?), irakurrita neukan semolinak pizzari beste ikutu bat ematen diola. Horren ondorioz, bila hasi nintzen eta ez nuen inon aurkitu.

Eibarren belardenda bateko tipoa "laostia" daki eta beregana joan nintzen.

Semolina? Semola esatea nahiko duzu.

Ez ez, semolina.

Aurpegi arraroa jarri zuen eta ez zeukala inoiz entxunda komentatu zidan. Eta ez hori bakarrik, inoiz ez ziotela eskeini eta inoiz ez duela ikusi berak duen katalogoan (15.000 produktu). Semola orde, bai.

Berriz ere sarera bueltatu nintzen eta ogi foroan, De Cecco markak zuela irakurri nuen, bainaaa ez. Hor ere, semola azaltzen da.

Googlen, semolina ipini eta wikipedian hau azaltzen da. Imagenes-en klikatu eta hor azaltzen diren irudi gehienetan ikusten dena, nik Eibarren ikusita neukan.

Argi nituen gauza batzuk, euren artean, guk erabiltzen ditugun irinak baino latzagoa dela. Zer egin nuen? joan eta zegoen finena erosi.

Sarrera honetan azaltzen den pizza egitera joan nintzenean, semola kafe-errotatik pasatu nuen pixkat gehiago fintzeko baina ez zen askoz gehiago findu e?, nahiko fina delako.

Irudien artean hau topatu nuen (itzulpena egiten duenean zer jartzen dizue? neri semola), eta beste hau (candeal?) ere, eta hau eta ..... Azkenean, txoratu baino lehenago neukanarekin egitea pentsatu nuen eta kitto!!! Baina gauza bat esango dizuet, argazkietan azaltzen dena bada, nik semolina daukat ;) Zuei zer iruditzen zaizue? daukat edo ez?

Txorizoz beteriko otartxoak.

2010-08-15T16:20:00.011+02:00

Cabuérnigan (Cantabria) nago, oporretan. Aspalditik daukat loiba nagusia atzetik hauxe esanez: tio, txorizoz beteriko ogia noiz egin behar diguzu? Irina daukat, txorizoa ere, bainaaaa ... ez nuen ikusten momentua.

Atzo (larunbata), kriston eguraldi txarra izan genuen, 18ºtik gora ez ginen pasatu eta etxeko batzuk hotzez hiltzen zeunden. Aitzaki ederra laba martxan ipintzeko pentsatu nuen, etaaa ... aurrera!!! Karapaixoa nuen buruan bainaaa, irudi hau ere. Berari arrautza egosia ez zaio gustatzen beraz, erabakia oso erreza izan zen.

Osagaiak:

350 gr. ogia egiteko galirina.

100 gr. zekale erdi integrala.

50 gr. zekale zuria.

275 gr. ur.

225 gr. ama ore.

12 gr. gatz.

Txorizoa.

Katilu baten irinak eta gatza ondo nahasi. Ura eta ama orea gehitu, ondo nahastu. Ordu erdi inguru laga autolisia egiten. Ondoren, mahai gainera atera eta nahi duzuen teknika erabiliz, 5-10 minutuz oratu.
Olioztatutako katilu baten sartu lehenengo hartzidura (atzo, 3 ordukoa) egin dezan. Ordu betero tolesdura bat eman nion. Azkenengo tolesdura ondoren, bola forma eman, eta 15 minutu inguru egonean laga.
Bolatxoak egin (100 gramoko hamar atera zitzaizkidan), eta txorizo zatiak goitik behera sartu.
Bigarren hartzidura bi ordukoa eman nien.

Kontutan izan, bigarren hartziduran (ordubete eta hogeita hamabost minutu + hogeita bost minutu labea berotzen) eta labean orea hasi egiten dela beraz, txorizoaren beste hainbeste kanpoan laga.
Ordubete eta berrogei minutu pasa ondoren, labea 250º-tara berotzen ipini. Tenperatura hartu duenean otartxoak sartu eta 12 minututan eginda daude.
Behean ikusten duzuenari gaur, goizeko 11etan, haginkada eman diot. Ezetz asmatu nolakoa zegoen, bai bai, zegoennnn!!!

Muxu bat.

Kanela eta mahaspasa ogia.

2010-07-26T10:00:00.004+02:00

Gaurko hau, Dan Lepard-en errezeta baten moldaketa duzue.

Berak, legami freskoa erabili zuen, nik orde, ama orearekin egin dut. Ur kopurua ere haundiagoa erabili dut baina beste osagai guztiak errespetatu egin ditut.

Mahaspasa kopurua beharbada haundiegia irudituko zaizue baina berak dioen bezala, mahaspasena bada mahaspasak eduki beharko ditu, ez? ;)

Osagaiak:

Ogia egiteko galirin zuria, 300gr.

Zekale integrala, 75gr.

Galirin integrala, 25gr.

Zekale ama orea, 200gr.

Ura, 200gr., 20º-tara

Oliba olioa, 50gr.

Eztia, 24gr.

Gatza, 8gr.

Kanela, 2gr.

Mahaspasak, 200gr.

Bol baten, irinak, kanela eta gatza nahasi. Beste baten, ama orea, ura, olioa, eztia eta mahaspasak nahastu eta osagai lehorren bolera bota. Eskuak erabiliz osagai guztiak ondo integratu eta laga hamar minutu estalita.

Mahai gaina olioztatu, orea bertara atera eta nahi duzuen teknika erabiliz bost-hamar minutu inguru oratu.

Olioztatutako bol baten sartu eta ordu eta erdiko hartzidura egiten laga.

Ondoren, boletik atera, oratu txiki bat egin, boleatu eta errosko forma eman.

Forma emateko, bi atzamarrekin goitik behera zulo bat egin eta zabaltzen joan.

Bigarren hartzidura eman, oraingoan bi ordu eta erdikoa edo tamaina bikoiztu arte.

Labea, 210º-tara berotzen ipini. Oreari, buelta osoan taxua eman, urarekin zipriztindu eta laberatu labaren erdian. 50 minutu inguruan eginda dago. Parrila baten gainean hozten laga. Hemen taxua eta mamiaren detaileak.

Ogia, itzela zegoen. Bi zati izoztuta neuzkan pare bat laguni pasatzeko, eta larunbatean eman nizkien.

Euren iritziak: ke te-ka-gas (literala) eta txapeau. Guztiz ados nago, noski!!!

Muxu bat.

Zekale (%100) ogi mingotsa.

2010-07-22T07:45:00.002+02:00

Aspaldi nahi nuen zekalearekin ogi bat egitea, nahastu barik, guztiz zekalezkoa, eta gaurkoa Dan Lepard-en "the art of handmade bread" liburutik atera dut. Bertan, Eskandinavian okin baloratua den Jan Hedh-ek zekalea nola manipulatu erakutsi ziola dino.

Ia irakiten dagoen ura irin pixkatekin nahasturik, zekaleari, malgutasuna ematen diola eta uraren tenperaturaren arabera emaitza desberdinak lortuko ditugula esaten digu. Nahasketa horri, gelatina deitzen dio.

Gelatina egiteko osagaiak:

Ura 90ºC-tara 240gr.

Zekale irina 60gr. -kasu honetan, erdi integrala-

Orea egiteko osagaiak:

Zekale ama orea 200gr., 21ºC-tara.

Ura 50gr., 19ºC-tara.

Gelatina 300gr.

Iragazitako zekale irin fina 300gr. -kasu honetan 200gr. integralak eta 100gr. zuriak-

Gatza 6gr.

Gelatina egiteko. Irina bol batera atera, ura irakiten jarri eta 90ºC hartzen dituenean irinarekin nahastu. Ondo irabiatu. Nahasketa pikortsua ez izatea lortu behar dugu, ados? Bol-a estali. Giro-tenperaturan ordu bete eta hogeitalau ordu artean utziko dugu, horrela, zekalea gelatinizatzea lortuko dugu eta horrek mamiari nolabaiteko malgutasuna emango dio.

Honekin batera zekale ama orea berpizten hasiko gara.

Dakizuenez, nik, ama orea hiru bider elikatzen dut. Berpiztu orduko 18 ordu pasatu ziren, bai?

Ba, gelatina ere, denbora bera egon zen estalita, ados?

Orea egiteko. Bol baten irina eta gatza nahastu. Beste baten, ura eta ama orea jarri eta ondo irabiatu.

Gelatina dagoen bol-etik bi koilarakada gorde, gero, ogiari gainetik emateko.

Ura eta ama orearekin egindako nahasketa gelatina dagoen bol-era bota, ondo nahastu eta irina eta gatza dauden bol-era pasatu. Ondo nahasi.

Mahai gaina olioztatu, orea bertara atera eta gozo gozo oratu. Boleatu eta laga.

Bannetoi bat irineztatu, oreari forma eman eta bertara sartu. 5 orduko hartzidura hartzen lagako dugu edo, ia bikoiztu arte.

Labea 210ºC-tara berotzen ipini. Orea, landare-paperakin estalita dagoen erretilu batera atera eta gelatinarekin margotu. Urarekin zipriztindu, labean sartu eta bost minutu pasa ondoren, berriz zipriztindu. 50 minututan egina dago.

Parrila baten gainean, laga hozten.

Hotzitu ondoren, landare paperarekin estali eta 24 ordutan laga horrela.

Uff!!! Hau urduritasuna, eta hortik zer aterako da?

Paketea zabaldu etaaa ... tatxannnnnnnn!!!

Hemen duzue atera zena.

Pisu dexente zeukan eta mozten hasi nuenean totxoa zela iruditu zitzaidan, bainaaaa keeeba, malgua da!!, eta kontutan izanda duen irin guztia zekalea dela, oso malgua dela esango nuke.

Goxoa redio!!! Zekalea gustokoa baduzue egin, ez zarete damutuko eta.

Kalera irten, lagunekin elkartu eta 30 minututan janda zegoen. Ahoan lagatzen duen zaporea, ez dauka izenik .... sinestezina!!!

Oharra.- Ogi hau, laister, errepikatzeko asmoa dut neurri batzuk aldatuz. Esango dizuet.

On egin!!!

Muxu bat

Atal berriak

2010-07-05T11:03:00.030+02:00

Urte bete pasa berri da bloga sortu nuenetik eta azkenengo sei hilabetetan (irinaketaurunak sortu genuenetik) erdi abandonatuta eduki ondoren eta buruari hainbat buelta eman ostean, bultzakada berri bat ematea pentsatu dut.

Lagun batzuei esker informatika munduan dexente aurreratu dudala uste dut, eta pare bat atal berri jartzea bururatu zait. Izenburuaren azpian azaltzen diren bi hoiek hain zuzen ere: Errezeta Aurkibidea eta Laguntzeko Asmoz.

Lehenengoa, eta bere izenak dioen moduan, errezetetara iristeko modu erosoagoa iruditzen zaidalako.

Bigarrena, hasiberri eta nire blogarekin topo egiten dutenentzat pentsatuta dago.

Duela 20 hilabete hasi nintzen ogia egiten eta atal honetan denbora horretan ikasitako guztia jartzeko asmoa dut.

Gaurtik hasita, eta astiaren arabera, pixkanaka pixkanaka gauzak sartzen joango naiz, idatziak, bideoak, etabar ....

Zuen gustukoa eta zuentzat baliogarria izatea espero dut; besterik ez.

Muxu bana.

Gari eta liho hazidun ogia

2010-06-02T20:27:00.003+02:00

Aurreko sarreran agindutakoa betetzen, hona hemen ogiaren errezeta.

On egin eta muxu bat.

ZORIONAK.

2010-04-27T00:01:00.003+02:00

Asteburuan, momentu honetan nire lagun haundienetariko bat den neska bat, etxera etorri da. Elgetan, ikastaro bat eman behar genuelako hain zuzen ere.

Gaur, bere urtebetzea da eta opari bat egitea nahi nion.

Ni, opariak egiten oso txarra naiz, inoiz ez zait gustatu eta. Horretan, gauza askotan bezala, zortea dut, ni aguantatzen nauena (Amaia) halakoetarako oso ona bait da. Baina kasu honetan ni neu egitea nahi nion. Lagun honek merezi duelako.

Bainaaa, zer oparitu?

Ostia tio!! tontua haiz ala? pentsatu nuen. Zergatik ezagutzen dok neska hau, zeri esker?

Egia!! ogiari esker. Baaa, egixok bat.

Eta zein ogi? Berari ogi alemanak asko gustatzen zaizkio, pentsatu nuen, baina zekalezko ama orea aktibatu barik neukan.

Berak oparitutako ogi liburu bat daukat (the art of handmade bread, Dan Lepard-ek idatzita). Bilatzen hasi nintzen eta ogi aleman bat topatu nuen (Linseed and wheat bread) eta osagaien artean ez da zekalea azaltzen.

Hauxe beroi egingo diot. Pentsatu, eta egin. Juantxoren erara, noski.

Azkenengo asteetan, bera eta ni eman dugun ikastarorako legami freskoarekin froga dexente egin behar izan ditut eta kokoteraino amaitu dut. Hainbeste froga egin ondoren erabaki bat hartu dut. Ogiak egiteko ama orea erabiltzea, beste legami guztiak ahal den eta gutxien erabili eta inoiz ez bada, hobe.

Ogi honek hori darama (legami freskoa), baina esan bezala moldatu (ama orea) egin nuen.

Gaur, ez noa errezeta ipintzera. Sarrera hau laguna zoriontzeko delako, besterik ez.

Errezeta beste egun baterako lagako dut, tokatzen zaidanean gure blog kolektiboan jarriko dizuet.

Duela gutxi, Eibarko baserri baten ere, elkar egon ginen. Baserrikoarekin eskonduta dagoena kasualitatez ikasketak lagunarekin egin zituen eta baserrikoa ezaguna dut. Deitu eta igande bat bertan pasa genuen. Baserria erakutsi ziguten, ogia egiteko duten tokia, gazta egiteko muntaia eta kriston babajana eman ere. Zein gustora egon nintzen, redio!!! Mila esker, Enrike eta Aizpea.

Jakinda, gazta asko gustatzen zaiola, baserrira deitu eta gazta bat erosi nien beraz, oparia ogia eta gazta izan zen. Bai bai, beheko argazkietan azaltzen direnak.

Zer iruditzen zaizue? Oparitutakoa, gustatzen zaizue? Bai? Ea berak zer esaten digun.

Beharbada ez da asko, berak hau eta askoz gehiago merezi duelako, baina bihotz bihotzez egindakoa da eta honezkero badakit gustatu zaiola.

ZORIONAK, Teba.
Amaia eta bion partez.

Milioi muxu, eta denak merezita gainera.

Karapaixo, Garipaua, Mokotza.

2010-04-01T18:56:00.009+02:00

Euskal Herriko eskualde konkreto batzuetan, garizuma garaian, egiten den ogia duzue .

Ez da ogi ezaguna, ezta gutxiago ere. Istorio propioa du.

Hemen duzuen karapaixo honek, bitxikeri bat ere dauka. Zerbait gehiago jakitzea nahi izanez gero, klikatu hemen.

On egin!!!

Irin apurrak aprobetxatuz ... + (ikastaroak)

2010-03-08T18:58:00.004+01:00

... moldeko ogia egin.

Ogia egiten hasi nintzenetik sarritan, irin apurrak geratzen zaizkit. Hor egoten dira, etxeko baztar guztietatik bueltak ematen. Paketetxoak eta paketetxoak. Batzuk elkartzen ditudanean, moldeko ogia egiteko erabiltzen ditut.

Ogi hauen errezeta eta ikastaroen berri izatea nahi baduzue, sartu hemen.

Muxu bat.

San Blas opila

2010-02-03T08:27:00.006+01:00

Gaur, San Blas eguna. Eibarren, egun haundia nahiz eta jai ez izan. Opilak egiteko eguna. Edonon anis usaina. Bedeinkatzera eraman eta gero kordoia saman lotu. Tradizioa da, tradizio polita. Esandakoa, egun haundia, usaintzua.

Hemen, egun honen kronika daukazue. Sartu eta disfrutatu. Nik uste, usaintzeko aukera ere izango duzuela. On egin eta muxu bat.

"Pelofanta", sarrera hau zuretzat. Merezi duzulako. Muxu potolo bat ere.

Alternatibak

2010-01-21T18:58:00.006+01:00

Aupa, hemen duzue hauen sarrera. Estualdi batetik ateratzeko ogiak dituzue. Edozeinek egiteko modukoak, errezak eta gozoak. On egin.

Muxu bat.

Errege-erroskoa

2010-01-04T11:40:00.006+01:00

Pare bat froga egin ondoren, azkenean lortu nuen erroskoa ama orearekin egitea.

Hemen emaitza.

Eta errezeta, hemen.

Muxu bat.

Blog berri on!!! Irinak eta Urunak

2010-01-01T22:00:00.008+01:00

Bueno oraingo honetan albiste berri batekin natorkizue. Niretzat izugarri ona den albistea, zuontzat ere horrela izatea espero dut.

Ogiaren istorioan hasi nintzenean, duela hamabost hilabete, ia ez nekien zer zan blog bat. Existitzen zirela banekien bai.

Halako blogak daude, informazio pila dute, gai guztien inguruan daude eta abarrekoak entzuten nituen baina...

Nire etxean ogia egiten hastea erabaki nuenean, ogiaren inguruan informazio bila hasi nintzen blog batzuetan sartzen. Euren artean ¿Te quedas a cenar? eta MTM (Madrid Tiene Miga). Hasiera baten irakurtzera sartzen nintzen, ehun mila galdera nituen egiteko baina, ez nintzan ausartzen. Beldurra kendu eta iruzkinak sartzen hasi nintzen. Erantzuten ninduten eta poz-pozik nengoen. MTM-koek blogean idazteko gonbidapena luzatu zidaten eta ... zergatik ez? esan nion nire buruari.

Gutxira, nire bloga sortu nuen, orduan ez nekien baina, niretzat egun horretan hasi zen gaurko istorio hau, Irinak Eta Urunak izena duen istorio hau.

MTM-ri kriston inbidia izan diot ezagutu nuenetik. Halako talde bat, ogiaren inguruan elkarturik. Halako zerbait Euskal Herrian lortuko bagenuuu. Bufff!!!!, ezinezkoa da.

Ezinezkoa? Baaa, ez.

Bapatean, ni Olaiaren blogean sartzen hasi nintzan. Idu, ordurako sartzen zen. Teba nire blogean, gutxira Intxaurtsu bat ere azaldu zen. Iruneee, eta hori zein da? Aaa bai, Busturiako ikastaroan egon zena. Maddi, ama orea egiteko arazoak zituela eta galdezka hasi zena.

Norbaitek beste bi ezagutzen zituela etaaa, eurei gonbidapena luzatzen badiet zer iruditzen zaizue?

Ohiana eta Marilu deitzen dira. Beranduago Mònicari ere esan genion

Konturatu orduko hamar ginen. Lehen aipatutako bederatziak eta neu, Juantxo.

Donostiko bi, Berangoko bat Bilbon bizi dena, Zarautztar beste bat, Erromokoa, Azkoitiarra, Barakaldokoa, Portugaletekoa baina Zugarramurdin bizi dena, bederatzigarrena Gasteizkoa? kasu honetan ez nago ziur eta ni neu Eibartarra.

Edarra kuadrilia. Zin dagizuet dotorea dela.

Dagoeneko zortzi ezagutzen ditut, bi falta zaizkit. Ezagutzen ditudanak, mundialak. Beste biak? seguru nago mundialak direla ere.

Beraz, blog kolektibo bat martxan jartzeko zer faltatzen zitzaigun? Gogoa, eta hori soberan daukagu. Baaa, aurrera!!!

Eta eguna heldu zaigu. Gaur, urte berriarekin batera, gure proiektu honi hasiera ematen diogu. Irinak eta Urunak du izena. Bi gauza lotzen gaituzte, Ogia eta Euskera.

Horregatik, bloga Euskeraz argitaratzearena, proposamena egin zenean hutsunea ikusten zelako. Gutariko batek esaten duen moduan Euskal Herrian gastronomia duen garrantzia ikusita eta kontutan izanda nolako sukaldaritza dagoen, zergatik daukagu hutsune hau? Nik ez dakit. Baaa, gu pausu hori ematea erabaki dugu eta aurrera goaz. Niretzat, pausu hau oso inportantea da, eta dakidalako talde honek duen potentziala, ziur nago ondo aterako zaigula.

Denon eskuetan dago, gure eskuetan eta zuon eskuetan ere.

Blog berriaren aurkezpeneko bertsoak esaten duen moduan zerbait behar baduzue hartu, denon mezederako izango da eta.

Blog berri on. Gaurtik aurrera Irinak eta Urunak zuon/denon bloga izatea espero dut. Disfrutatu.

PD. Momentuz ez dakit zer egingo dudan nire blogarekin baina, ez da desagertuko. Ikusiko dut. Hemendik aurrera nik egindako ogi guztiak blog berrian (Irinak eta Urunak) argitaratuko ditut, eta jarraituko dut ogi berberak MTM-n erderaz argitaratzen.

Muxu haundi bat denontzat.

Egun haundi bat.

2009-11-28T01:15:00.010+01:00

Sarrera honetan protagonistak ez dira nik egindako ogiak, ezta neu ere ez.

Egun honen zain nengoen, aspaldi. Egunero ikusten ditudan "enan@" hoiekin nire blog honetan sarrera bat jartzea nahi nuen. San Andres (Eibarko patroia) eguna, azaroaren 30an da baina, Ikastolan bezperetan ospatzen dugu.

Urtero ospatzen den egun haundia da. Umeentzat ondo pasatzeko eguna eta besteontzat ere. Baserritarrez jantzita etortzen dira eta ez daukate klaserik; iuuupiiiiii!!!!

Ikastolara heldu nintzenean, egunasentia, argazkietan ikusten den bezala zegoen. Egun polita zetorrela zirudien eta horrela izan zen.

Argazkiak ikustea besterik ez dago, lana toki pribilegiatu baten egiten dudala jakiteko. Naturaren erdian, Eibartik bi kilometro eta erdira, Arrateko bidean. Alde hortatik behintzat kriston zortea dut, dudarik gabe.

Zer egiten dute umeak eta irakasleak egun horretan?

Hasi, egun batzuk lehenago hasten dira. Badakizue, antolakuntza: barazkiak, opilak, tresna zaharrak eta halakoak ekarri, azoka dotore bat ipintzeko. Bertsoak, abestiak, dantzak eta abar entseiatu, egun horretan dena ondo atera dadin.

Zergatik? ba, gehien maite dituzten pertsonak etortzen direlako. Gurasoak, aittitta-amamak, anai-arrebak, senideak. Dena ondo atera behar da, inpresionatu behar dituztelako.

Nik, lortzen dutela esango nuke.

Ikastola gainezka egoten da, jendea barra-barra. Edonon topatu ditzakezu, pasiloetan, geletan, komunetan ... Nik ez dakit zenbat pertsona elkartu gaitezken. 700/800, gehiago? ez dakit...

Hamabiak inguruan azaltzen dira. Hasteko, agurra dantzatzen diete ondoren, mailaz maila batzuk abestiak, beste batzuk bertsoak, eta abar... denak, oso ondo prestatuak. Esan bezala, egun haundia.

Bukatu ondoren umeak bazkaltzera jaisten dira eta bisitariak tripa zorriak isilaraztera zerbait janez.

Eta zerbait horren barruan, zer gauza daude? Ba, beste gauza batzuen artean, TALOAK.

Zer pentsatzen zenuten ba? Hamabiak arte ez dutela ezer egiten ala? Oso langileak dira, jeje.

4., 5. eta 6. mailakoek, irakasle batzuen laguntzaz, prestatzen dituzte. Batzuk, kriston talo dotoreak, beste batzuk ez hainbeste baina, denak goxoak, ze demontre!!! 500 bat talo edo gehiago, badaukate meritua....!! ez zaudete ados nirekin?. Bien bitartean txikiek, marrazkiak eta halakoak egiten dituzte gela txukuntzeko eta bisitariei erakusteko. Eurek ere oso langileak direlako.

Taloak egiteko osagai hauek erabili zituzten:

Artoirina

Galirin apur bat (hau tranpa pixkat bada, baina beeno...)

Ur beroa

Gatza

Ez ditut kopuruak jarri ez nituelako pisatu.

Sukaldean txorizoa egosten zuten bitartean umeak, irakasleen laguntzarekin orea egiten hasi ziren.

Irina mahai gainera bota eta sumendi bat egin, gatza eta ura gehitu. Atzamarrekin nahastu. Oratu, orea leuna egon arte. Estali (ez da beharrezkoa) momentutxo baten. Oretik, zatiak hartu, forma zilindrikoa eta zapal zapala eman. Ondo berotuta dagoenean zartaginera bota eta eginda daudenean atera. Txorizoa ipini eta ñam ñam.

Hori egin nuen nik, ñamñamñam. Redio!! Ze, goxoa!!!!

Arratsaldean, herri kirolak eta jolasak. Ondo, ezta? Ez didazue esango ez dela egun haundia, e?

Zeeer?, zuek egun haundiagoa prestatzeko gai zaretela? Ez dut uste.

Sarrera hau egun horretan parte hartu zuten guztiei eskaintzen diet.

Muxu bana denontzat.

Urte askooootarako

2009-11-24T22:13:00.007+01:00

eta nik bertan ikusteko.

Hilaren 17an, Amaiaren urtebetetzea izan zen eta ospatu beharra zegoen. Igandean koinatuak eta loibak etorri ziren. Koinatuak etortzen direnean, ogia egin behar diet, loibei berriz, postrea. Ogia, edozein izan daiteke, postrea ez. Postrea, eurek esandakoa. Oraingo honetan, gazta tarta eta donutsak.

Ostiralean, espelta irinarekin, hiru ogi egin nizkien. Hemen, euretariko bat.

Errezeta hemen daukazue eta hemen hobetuta.

Igandean, donutsak eta gazta tarta.

Bainaaa, onena ezustekoak izaten dira eta nik larunbatean egindako bat, gordeta neukan.

Zein? Hau.

Eta, hori zer da? Ba, hau Dan Leppard-en Lard Cake da. Hik ez dakik ingelesa barren, esango duzue batzuk eta halaxe da. Baina, lagun onak bai. Kasu honetan, laguna dudan Tebak, errezetaren fotokopia bidali zidan. Sarean dauden lau itzultzaile zabaldu eta itzuli egin nuen. Nola, suposatzen duzue ezta? Itzulpena berari bidali nion eta zuzenketa batzuk ondoren, berriz nere eskuetan neukan.

Osagaiak:

Galirin zuria 500gr.

Ama orea 200gr.

Ura 250gr. 20 gradutara.

Gatza 13gr.

2 koilaratxo eta erdi legami freskoa, birrinduta. (10gr.)

Txerri gantza 150gr.

Azukre-hauts 150gr.

Intxaur muskatu arraspatua

2 koilara azukre-hauts hautseztatzeko.

Bol baten, irina eta gatza nahastu. Beste baten, ama orea, ura eta legami freskoa irabiatu. Likidoa, beste bol-era bota eta nahastu ore leuna eta likina eduki arte. Estali eta hamar minutu laga egonean. Lan-gainazala olioztatu eta hamar segunduz oratu, bola forma eman, olioztatutako bol baten sartu, estali eta hamar minutu laga egonean. Orea atera eta operazio berbera egin, baina oraingoan atsedena ordu betekoa izango da, 21-25 gradutan. Oratzeko, Leppard-en oraketa laburrak erabili nituen.

Lan-gainazala irineztatu, orea luzatuz laukizuzen forma eman, 1,2 zentimetroko lodiera eduki arte. Gantza, xerra finetan moztu eta orearen bi herenetan zabaldu. Azukre-hautsa hautseztatu. Gero, beste herenarekin gantza eta azukrea duen erdia tapatu, eta beheko erdia goruntz tolestu (gutuna balitz bezala). Ore barruan, gantza eta azukre guztiz tapatuta geratu behar dira. Orea alde bietatik irineztatuta egon behar da, luzatu, berriz laukizuzena izan arte. Orea, hirutan tolestu berriz ere, estali eta toki fresku baten laga. Niri, hori ahaztu zitzaidan.

Orea, lan-gainazalean luzatu zentimetroko lodiera izan arte. Hegal batetik hasita, biribilduz, zilindro estu bat egin, estali eta 1o minutu laga.

Desmuntatzen den molde baten oinarria, landare-paperarekin forratu. Zorrotza dagoen zerbaitekin, zilindroari alde batetik bestera taxua eman. Orduan, mozketa goruntz begira jarriz oreari, molde oinarrian kiribil forma eman. Moldeari, landare-paperarekin forratuta hegalekoa ipini, estali eta ordu bete edo ia bikoiztu arte laga.

Labea, 200 gradutara aurretik berotu. Intxaur muskatua bota eta azukre-hautsa hautseztatu. Labearen erdian 20 minutuz labekatu ondoren tenperatura 175 gradutara jaitsi, eta beste berrogei minutu inguru eduki edo azalak marroi ilun kolorea izan arte, iaia erreta egongo balitz bezala. Parrilara pasatu baino lehenago, ordu laurden bat moldean bertan, hozten laga.

On egin.

Besarkada bat denontzat.

Sarrera hau, Amaiari eskaintzen diot. Muaka, muaka.

Tebari, mila esker merezi dituelako. Muxu bet politte.

Pain à l´ancienne (nire bertsioa).

2009-11-08T20:38:00.006+01:00

Ogi honi kriston gogoa nion. Aspalditik, gainera.

Topatu ditudan errezeta guztietan erositako legamiarekin eginda azaltzen da. Nire asmoa, erositako legamia ahal dudan eta gutxien erabiltzea da. Ez naiz horren kontrakoa, nahi duenak erabiltzea dauka baina, nik ahal badut behintzat, ez dut erabiliko. Froga bat egin nuen eta ondo atera zitzaidan edo, hori uste dut.

Lan gutxi duen ogia da, berezitasun batzuk ditu. Adibidez, ura 4º. egon behar duela, hidratazio haundikoa dela. Ogi honen kasuan %80, etab.

Osagaiak:

Galirin zuria 250 gr.

Etxean egindako legamia 100 gr. (hau da berpiztuta neukana)

Ura 190 gr.

Gatza 7 gr.

Azukrea 3 gr.

Irina, gatza eta azukrea nahastu. Ura eta legamia gehitu. Oratu. Esaten dute ez dagoela oratu beharrik baina. nik egin nuen. Oso likidoa zegoen beraz, bolean bertan oratu nuen. Argazkian ikusi dezakezuenez, goruntz ateratzen da (pixkat lartxo dago zuek ondo irudikatzeko). Ia ondo azaltzen dudan zuek ulertzeko. Eskua ondo buztita, albo batetik, bolean sartu. Orea heldu, igo eta erlojuaren orratzen norabidean jiratu, bol-a beste eskuarekin alderantziz biratzen den bitartean. Horrela, oretik pikor guztiak desagertu arte. Bol bat olioz igurtzi eta sartu. Hozkailuan gorde.

Hurrengo egunean atera eta (nire kasuan) zortzi ordu giro-tenperaturan laga nuen, ia ia bikoiztu arte.

Ez dakit ondo ikusten den baina, hozkailutik atera nuenean bol-ari marra bat egin nion. Hamar ordu ondoren horrela zegoen.

Eta hemendik aurrera "salvese quien pueda". Maneiatzea oso zaila da, niretzat bai, behintzat.
Labea, aurretik berotu (250º). Erretilu neurrira, landare papera moztu eta irin dexente bota. Ondo bustitako espatula batekin, bol-etik paperera atera baina, kontuz!! Ahal den eta gutxien gasgabetu behar da. Gainetik ere irina bota. Ahal den forma eman eta labera, lurrunarekin. Hamabost minutu pasa ondoren ura atera nion eta beste hamar minututan eginda zegoen.

Orain arte egin dudan ogirik gozoena dela ez dakit esango nukeen baina, hor dabilela bai.

Zaporea? zoragarria!!

Zalantzarik gabe, sarritan egingo dudan ogia da. Ogitartekoak egiteko ezin hobea. Atzo gauean bezala, pare bat arrautz frijitutan txapla txapla egiteko ere, mundiala!! Eta lan gutxi, jeje.

Pd. Hozkailutik atera ondoren ez ziren hamar ordu izan, zortzi baizik.

Muxu bat.

Jolasean

2009-10-26T22:05:00.001+01:00

Hamar hauekin, amaigabea zirudien hilara, bukatzen dut (ziur nago berriz ere egingo dela). Aurreko sarreran jarritako ogi bera da, baina forma desberdinekin. Ea gustatzen zaizkizuen.

Nahiz eta bi sarreren artean 28 argazki egon, ogiak, 36 izan ziren. Lau ogiko, 6 labealdi eta seiko, bi. Zer edo zer desberdina egiteko gogoa neukan eta hor emaitzak. Lan dexente baina, gustora. A!! taxua, soilik, euretariko bi dute.

Muxu bat

Ogi bat, ..... anitz.

2009-10-15T18:44:00.003+02:00

.....= mozketa, ebaki, taxu. Bakoitzak nahi duen izena ipini.
Zuoi, ez zaizue inoiz pasatu istorio baten hasi, gauzak nahiko ondo atera eta bapatean, daztatzaileen hilara kilometrikoa izan? Ez? ba neri bai.
Despentsan muturra sartu, zekale erdi integralaren 5 kiloko zakua ikusi eta jakinda, galirin zuria neukala, hilara hori murriztea bururatu zitzaidan. Aste bete pasatu dut ogia egiten, burutik jota egongo banintz bezala. Denak berdinak, noski. Bestela badakizue "neriak zekale gutxiago zeukan, beste horrenak ... ez dakit zer" betikoa. Oreak, kilokoak egin nituen gero erdibitzeko. Beraz kilo erdiko ogiak, oparitzeko nahikoa ez? Hitz batean, denak berdinak egin nituela osagai hauekin:

Galirin zuria 350 gr.
Zekale erdi integrala 150 gr.
Ura 290 gr.
Legamia 200 gr.
Gatza 15 gr.
Azukrea 8 gr.

Oreak, beti bezala egin nituen. Oraingo honetan, lehenengo hartziduraren ostean erdibitu nituen.
Biribildu, deskantsatzen utzi, forma eman eta bannetonetan sartu. Gaueko hamabiak inguruan, launaka, laberatu. Hamar minutuero, erretiluak aldatzen nituen. Goian zegoena behera pasatuz eta alderantziz. Hau, ahal den eta azkarren. Ez da lan asko baina, erretiluen hotsa eta halako orduetan ba ... Ordutik, etxebarrukoak desberdin begiratzen naute. Zertan nabilen jabetzen badira, hilara amaigabe horretan sartzeko kapaz dituk/n jeje.

Aurreko sarrera baten epa!k, ogia ikusi bezain pronto, ..... gatik, bazekiela nirea zela esaten zidan. Sinadura balitz bezala. Alferkeria zela esan nion eta egia da. Bere iruzkinari esker aste horretan behintzat, alferkeria alde batera laga nuen eta sarrera hau egitea bururatu ere. Irudi batek mila hitz baino gehiago balio badu, pentsaizue zenbat balioko duten 18 irudi, buah!!

Izena nahi duzuena ipini baina, buruari astindu txiki bat emanez gero, "birgeriak" egin daitezke, edo ez? Ogian, ARTEA? Zergatik ez?

Oharra.- Ez dakit konturatu zareten, baina azkena, irribarrea izatea nahi zuen, jeje.

Joer, sudurra Pinotxorena baino haundiagoa atera zitzaidan, gizajoa!!

Bestalde azaltzea, ogiaren inguruan blog berri bat dagoela sarean, panis nostrum, izenarekin. Ez dut izan astirik irakurtzeko baina, lehenengo inpresioa ezin hobea da.

Musu bat denontzat.

Maitasunaren ogia

2009-10-07T09:05:00.010+02:00

Batzuk, beharbada, ogi hau ezagutzen duzue. Mónikak (bons focs) bere bloggean argitaratu zuelako.

Duela hiru aste ta piku, ogi afrodiakoa? izena zuen post bat jarri nuen bloggean. Iruzkinen artean bat, Mònicarena zen. Bertan, Dan Lepard-en ogi bat aipatzen zuen. Susan-ek (Wild Yeast), ogi hau afrodisiakoa dela esaten duela eta maitasunaren ogia deitzen diola.

-Probatu, izugarri gustatuko zaizu eta, jartzen zidan eta esteka bat ere.

-Zergatik ez? pentsatu nuen.

Esteka zabaldu eta... ingeleses zegoen. Mail bat bidali nion eta errezeta erderatu egin zidan. Beraz, ogia, berari esker dihoakizue .

Osagaiak:

Galirin zuria 250 gr.
Galirin integrala 250 gr.
Ardo beltza 250 gr.
Legami naturala 300 gr.
Gatza 7 gr.
Pinaziak 100 gr.
Pikupasak 200 gr.

Bezperan ardoa, pinaziak eta pikupasak esne-ontzi baten irakiten ipini. Minutu bat pasatu ondoren, baztertu eta estalita utzi gau osoan. Oheratzera zoaztenean, irabiatu.

Hurrengo egunean likidoa iragazi eta erreserbatu. Likido horri ura gehitu 260 gr. eduki arte.

Osagai guztiak nahastu, gatza ere. Laga hamar minutu, egonean. Ondoren, mahai gainera irin pixkat bota eta Dan Lepard-en teknika erabiliz, 10-15 segundu oratu. Bol bati olioa igurtzi eta orea, bertan sartu. Ordu erdi pasatu eta gero, beste 10-15 segundu oratu, berriz bol-ean sartu. Ordu erdira etara, 10-15 segundu oratu eta berriz bol-era. Oraingoan ordu betera etara, biribildu eta laga bost minutu estalita.

Obal forma eman eta lautu -ogi zapala da-.

Landare-paperari irin pixkat bota eta orea bertan ipini. Trapu bati irina bota eta orea berarekin estali. Laga ordu eta erdi harrotzen. Labea, aurretik berotzen ipini. Orea, olioz igurtzi eta taxuak eman. Labean sartu 210 gradutara lurrunarekin. Hogei minutu pasatu ondoren ura etara eta laga eginda egon arte. Guztira, 45 minutu inguru.

Hanka sartze txikia izan nuen ardoa neurtzerakoan, 250 gr. bota beharrean 150 gr. bota nizkion beraz, ur gehiago dauka.

Onaaa, redio!! Mònikak arrazoia zeukan, izugarri gustatu zaigu eta. Bera bakarrik jan genuen baina, gazta pixkatekin....buah!! Oraingoan gainera, funtzionatu du. Gustiz maiteminduta nago, jeje. Hemendik aurrera ez dago aitzakirik, maitemin bazaudete, maitaaaasunaren ogia jatea besterik ez dago.

Mónikari eskainita.

Musu bat.

Pa amb fajol

2009-09-29T15:45:00.007+02:00

Izenburua katalanez jarri diot irina bertatik ekarri nuelako, Els Hostalets d´en Bas herritik hain zuzen ere.

Duela urte batzuk Catalunyatik bueltan toki dotore batetik pasatu ginen. Etxera heldu bezain pronto, mapan begiratu eta La Garrotxa zela ikusi genuen. Ordutik, buruan sartuta geneukan baina pasa zen astean bertan egon ginen. Toki berezia da, oso. Magikoa, Mònikak (bonsfocs) esan zigun bezala. Naturak jan egiten zaitu. Berrogei sumenditik gora ditu. Airetik ikusi daitezke, globo aerostatikoetan irteerak antolatzen dituztelako. Haize zakarra zebilenez, ezin izan zuten gustiz pustu beraz, sumendiak lurretik ikusi behar izan genituen. Ederra putadia!! bueltatu beharko gara. Putadia dinot, baina heurentzat, jeje, berriz jasan beharko gaituztelako. Eta bueltatuko gara, seguru.
Erdi aroko herriak daude (Besalú, Sta. Pau,...) Mendi ibilbide errezak eta bizikletan ibiltzeko aukera asko. Ondo jaten da, oso ondo eta hori Euskal Herritarrontzat oso garrantzitsua da, ezta? jeje. Eta janari goxo horren bila, L´Hostalet jatetxera heldu ginen. Sarreran, bertako produkto batzuen erakusketa daukate, heuren artean, fajol haziak eta irina. Ez zutela saltzen eta lortzea oso zaila zela esan ziguten baina, nahi izanez gero, apur bat emango zigutela. Esan eta egin, 250 gr. gurekin etorri ziren. Mila esker.

Osagaiak:
Fajol irina 150 gr.
Galirin zuria 350 gr.
Ura 260 gr.
Legami naturala 200 gr.
Azukrea 6 gr.
Gatza 14 gr.

Orea, beste batzuetan bezala egin nuen. Osagai guztiak nahasi, gatza ezik. Laga ordu erdi egonean, gatza gehitu eta bost minutu inguru oratu. Nahiko itsaskorra da beraz, pazientzia euki. Hiru tolesdura eman, formatu, ordu eta erdi bannetonean eta labean sartu. Lehenengo hogei minutuak, lurrunarekin, 225 gradutara. Ondoren ura etara, 200 gradutara jaitsi eta beste 25 minutu eduki.
Argazkian ikusi daitekenez errautsa dela ematen du, usain arraroa dauka. Eder ederra zegoen. Behin Madridtienemiga-ko batek (Ajonjoli) esan zuen fajolaren zaporeak ez zaituela interes gabe lagatzen eta arrazoi guztia zeukan. Zapore sendoa dauka, oso. Guri asko gustatu zaigu. Mamiak gris-ilun kolorea hartzen du, dotorea!!.

Bon profit. Petons denontzat.

Olaiari eskainita. Milesker eder horri.

Ogi afrodisiakoa?

2009-09-12T10:42:00.009+02:00

Berriz ere, "El aprendiz de panadero" liburuan ikusitako ogi baten moldaketarekin natorkizue. Oraingo honetan kanela, mahaspasak eta intxaurrekin egindako ogia. Esaten dutenez, kanela afrodisiakoa da. Egia izango ote da? -Ez nuen ezer arrarorik sentitu, bezperan sentitu nuen gauza bera, besterik ez jeje-.Horregatik post honen izenburua.

Kasu honetan, ogiari, forma desberdina ematea pentsatu nuen. Maskor itxura, hain zuzen ere.

Osagaiak:

Galirina 500 gr.

Ura 150 gr.

Legami naturala 150 gr.

Esne osoa 85 gr.

Azukrea 20 gr.

Gatza 9 gr.

Kanela 4-5 gr.

Margarina 30 gr.

Arrautza 1

Mahaspasak eta intxaurrak 100 gr. (bien artean)

Irina, azukrea, kanela, mahaspasak eta intxaurrak ontzi batera bota eta nahasi. Arrautza, esnea, margarina, ura eta legami naturala gehitu eta nahastu. Ordu erdi bat laga atsedena hartzen. Ondoren, gatza gehitu eta 10 minutu inguru, oratu. Oso itsaskorra zegoenez, irin pixkat bota behar izan nuen mahai gainera.

Ontzi bat olioz igurtzi, orea bertan sartu eta estalita utzi. Hurrengo hiru ordutan, 3 tolesdura eman. Mahai gainera irin pixkat bota, forma luzea eman eta erditik hasita biribiltzen joan, maskor itxura hartu arte. Laga, 1,5-2 ordu harrotzen. Labean sartu, lehenengo 20 minutuak 250-225 gradutan lurrunarekin. Ura atera eta hurrengo ordu laurdena, 200 gradutan egin. Amaitzeko, azken ordu laurdena 180 gradutara.

Nahi izanez gero, ogia labetik ateratakoan, desegindako margarina pixkatekin pintatu eta, kanela azukrearekin nahastuta gainetik bota. Guk, hori egin genion.

Ogi hau goxoegia izango zela pentsatu nuen baina, ez zen horrela izan. Orokorrean, gozoa da bai, baina jaterakoan sentsazio desberdinak izan nituen. Goiko parteko zati bat jaterakoan gozoa da, baina ez larregi. Beheko partean bat ez. Nire koinatak, ogi-bizkotxoa dela esaten du. Oso gutxi iraundu zuen, hori seinale ona da, ez? On egin.

Bi koloreko ogia

2009-09-04T21:42:00.003+02:00

Duela sei hilabete, "el aprendiz de panadero" liburuan, bi koloretako ogia ikusi nuen eta gauza bitxia iruditu zitzaidan. Irudia buruan sartuta neukan eta uda honetan froga bat egin nuen (nire erara moldatuz). Ez nion nesquik (ez neukan kakaorik) asko bota, kafe koilaratxoa besterik ez. Ogiak, bi kolorekin atera zen, kontraste askorik gabe eta ni neu kontraste handiagoa nahi nuen. Beraz, beste bat egin behar nuen.

Ogi hau egiteko bi ore berdinak egin behar dira, ahal den neurrian behintzat. Zergatik? Ba, bi oreak antzeko harrotu behar direlako. Eibarrera heldu, kakaoa erosi eta ogia egin nuen.

Osagaiak:

Galirin zuria 190 gr.

Zekale zuria 85 gr.

Ura 140 gr.

Legami naturala 100 gr.

Gatza 7 gr.

Izerdi siropea 6 gr.

Bi oreak osagai hauek dituzte, baina bigarrenari: Kakao 30 gr. gehitu nizkion eta ur pixkat (5-10 gr).

Oreak beti bezala landu nituen. Lehenengo hartziduran 3 ordutan, 3 tolesdura egin nizkion baina, forma emateko, bakoitza bi zatitan moztu nuen. Lau zatiei, forma berdina eman nien (laukizuzena). Laurak pilatu nituen. Zuria, iluna, zuria eta azkenik iluna berriz. Bata bestearen gainean, bai? Orearen herena, erdira eraman eta eskuaren ertzarekin zapaldu nuen itsatsiarte. Orearen beste aldea horren gainetik pasatu eta juntura itsatsi. Itsatsita dagoenean biratu pixkat, aurrera eta atzera, nahi dugun forma hartu arte eta bannetonean sartu. Ordu eta erdi harrotzen laga eta aurretik berotutako labean sartu. Eginda dagoenean atera, laga egun batetik bestera, ahal baduzue behintzat jeje, moztu eta tachannnn. Dotore, ezta?

Argazkian, ogiarekin batera azaltzen den tresna, taxuak emateko erabiltzen dudan azmakizuna da.

Moldeko ogia

2009-09-01T16:10:00.005+02:00

Snif, snif!! Oporrak amaitu zaizkit, berriz lanean ari naiz eta kriston negar gura daukat. Ez sinistuuuu, txantxetan nabil eta. Egia esanda, ezin naiz kexatu, hilabete eta erdi eduki baitut, jeje.

Bloga berriz martxan ipintzeko, oporretan egunero gozaldu dugun moldeko ogi batekin hasiko naiz. Ogi hau, lehenengo aldiz egin nuenean, irin apur batzuk aprobetxatzeko egin nuen eta asko gustatu zitzaigun. Ordutik astero egiten dut.

Osagaiak:

Galirin zuria 200 gr.
Galirin integrala 95 gr.
Espelta erdi integrala 95 gr.
Zekale zuria 85 gr.
Ura 275 gr.
Legami naturala 200 gr.
Muesli 75 gr.
Mitxoleta haziak 10 gr.
Txarpoila (alcaravea) 3 gr.
Ekilore olioa 25 gr.
Azukrea 10 gr.
Gatza 13 gr.

Bol batean, osagai lehor guztiak ipini gatza ezik eta ondo nahasi. Ura, olioa eta legami naturala gehitu, nahastu eta ordu erdi inguru laga atsedentzen. Ondoren, gatza gehitu eta 5 minutu inguru oratu. Olio pixkatekin bol bat igurtzi, orea bertan sartu eta trapu batekin estali. Ordu betera lehenengo tolesdura eman, beste ordu bete pasatu eta gero, bigarrena. Ondoren, forma eman eta moldean sartu. Ordu eta erdira labean sartu, 200 gradutara eta 40 minututan eginda dago.

Edozein mermeladarekin gozoa egongo dela uste dut baina guk, etxean tomatearekin eginiko mermeladarekin jaten dugu.

Tomatea, tomatearen pixuaren erdia azukre, limoi baten zukua eta banilla zatitxo bat erditik zabalduta. Mundiala.

Hasteko, nahikoa ez?

Asteburu, langilea.

2009-07-12T22:25:00.018+02:00

Bi aste pasatu ondoren, berriz ere, zuekin nago. Rincon del Segura-ra irina eskatuta neukan eta jaso bezain pronto lanean hasi nintzen. Duela hilabete eta erdi Ibanen blogean ogi hau ikusi nuen eta hamar egun dira Olaiaren blogean beste hau ikusi nuela. Bi post hoiek kontutan izanda eta Euskal Herrian taloa txorizoz betea hain tipikoa denez, ogi hau egitea bururatu zitzaidan.

Osagaiak:
Galirin zuria 300 gr.
Arto irin integrala 200 gr.
Ura 270 gr.
Legami naturala 200 gr.
Gatza 12 gr.

Ore bat egin nuen. Irinak eta azukrea nahastu, ura eta legamia gehitu, dena nahasi, laga ordu erdi atsedena hartzen, gatza bota eta 10 minutuz oratu. Bol batera sartu eta estali. Hurrengo hiru ordutan 3 tolesdura egin nizkion eta hozkailura sartu nuen (berandu zan). Hurrengo egunean atera eta ordu bete laga giro-tenperatura hartu zezan. Ondoren erditik moztu nuen. Bati, forma eman eta bannetonean sartu. Beste erdia hirutan moztu nuen, txorizo zatiak sartu, forma eman eta labeko erretiluan estalita laga. Pare bat ordu pasatu eta gero, labea berotzen ipini, taxuak eman eta laurak bertara sartu nituen. Lehenengo 20 minutuak, lurrunarekin, 225 gradutara eduki nituen, hurrengo 10 minutuak 200 gradutan eta 180 gradutan azkenengo hamarrak.

Hor dituzue laurak.

Hemen barrutik.

Oso onak zeunden, arrakasta haundia eduki zuten. Pentsatzen nuen arto zapore gehiago edukiko zutela baina....ño!! Hurrengoan arto irin gehiago botako diot. Lehenengo aldia zen erabiltzen nuela eta gehiago botatzen ez nintzen ausartu. Oso hareatsua da, ez du ondo batzen, horregatik dauka galirina.

Denbora nuen eta labea beroa zegoenez, behin Olaiaren blogean muffin hauek ikusi eta egitea pentsatu nuen eta horra hor emaitza. Bere blogean azaltzen diren osagai (nik laktosadun esnea erabili nuen) berberekin egin nituen. Joer!! benetan mundialak, Olaia.

Eta labea oraindik beroa jarraitzen zuenez ba, cooki hauek ere, jeje. Beste blog batetik atera nituen baina ez dut gogoratzen izena (barkatu).

Osagaiak:

Galirin zuria 150 gr.

Txokolate iluna 100 gr. (zati txikitan moztuta, txikiak baina ikusteko modukoak)

Azukre-hautsa 80 gr.

Gurina 80 gr.

Legami kimikoa koilaratxokada bat

Arrautz baten gorringoa

Gatz pixka bat

Gorringoa azukrearekin irabiatu nahastea zuritu arte. Gurina, irina, legamia eta gatza gehitu, dena ondo nahastu (solte samar geratzen da) eta amaitzeko txokolatea bota. Ordu bete edo gehiago, hozkailura sartu. Labea, 170 gradutara berotzen ipini. Hozkailutik atera, bolak egin, zapaldu (6 zm. diametroa eta zm. bat lodieran) eta erretiluan jarri paper edo silikona gainean. 15 minutu ingurutan eginda daude. Hauek ere, mundialak!!.

PD.- Cookie hauek, bocadosdulcesysalados.blogspot.com blogetik atera nituen.

Uda, beroa, hartzidura.

2009-06-28T22:31:00.002+02:00

Uda, beroa, hartzidura (fermentazioa). Kontuz!! udan hau... udan beste hori. Beroarekin dena azkarrago doala. Beti istorio berdinak entzuten.

Pasa zen astean Iduk (ogiaren munduan dabilen beste zoro bat) zera galdetu zidan, ia bannetonean orea zenbat denbora edukitzen nuen. Erantzuna eman nion baina kontuz!!, uda, beroa ... eta bide batez, istorio guzti hoiek niretzat ere argitzeko, froga bat egingo nuela esan ere. Froga, hau izango zela: bi ogi osagai berdinekin baina, hartzidura desberdina emanez. Hemen emaitzak.

Osagaiak:

Galirin zuria 325 gr.

Zekale zuria 175 gr.

Ura 260 gr.

Legami naturala 200 gr.

Gatza 12 gr.

Azukrea 6 gr.

Osagai guztiak nahastu, gatza ezik. Ordu erdi pasatu ondoren gatza gehitu eta bost minutu inguru oratu. Bi oreak berdin berdinak egin nituen baina bati (borobila), hurrengo hiru ordutan 3 tolesdura eman nizkion. Besteari (luzea) ordea, 2,5 ordutan bi. Forma eman eta bannetonetan sartu. Bertan, borobilak 2 ordu pasa zituen, luzeak 1,5 ordu. Taxuak eman eta labean sartu, denbora bera eduki nituen, 50 minutu.

Hauek guk (dastatzaileak eta nik) igarritako diferentziak

Harrotu, biak antzeko samar harrotu ziren, beharbada, luzearen mamia harroagoa geratu zen baina biak oso malgotasun haundiarekin. Taxua, luzeari labean gehiago zabaldu zitzaion beraz (nire gustorako), estetikoki politagoa geratu zen. Alde haundiena zaporean igarri genuen, borobila bestea baino askoz garratzagoa zegoen. Iraundu, biak ere antzeko samar, ordu bete? edo gutxiago, jeje.

Ondorioa? Beroa geroz eta haundiagoa izan, nik behintzat, harrotzen denbora gutxiago izango ditut.

Animo, naiz eta kriston beroa egin lortuko dugu eta. Aupa Idu eta Olaia, "txupauta" dago eta.

Musu pila denontzat.

Istorio txiki bat.

2009-06-21T19:45:00.016+02:00

17 urte inguru dira, Eibarko baserritar bati ogia erosten hasi ginela. Ostiralero erosten genion baina, hurrengo ostiralera ailegatzen ez zitzaigunez, ogia okindegietan erostera behartuta geunden eta sarritan egunean bertan gogortu edo txiklea bezala geratzen ziren.

Nola egingo dute baserri horretan ogia? galdetzen nion nire buruari.

Duela hiru urte Aulestiko lagunek bazkari batera gonbidatu gintuzten eta bazkari hartan kriston ogia dastatzeko aukera izan genuen.

Non erosi duzue? galdetu nien.
Erosi? etxean egiten dugu, erantzuna.
No jodas, nik.
Nola egiten duzu? hurrengo galdera.

Azalpenak eman zizkidan eta ez zitzaidan zaila iruditu.

Animatu eta egin, ikusi duzu kalitate aldetik ez daukala zer ikusirik, esan zidan berak.

Lehen buruari bueltak ematen banizkion hortik aurrera ... "la reostia".

Baina badakizue, alde batetik beldur pixkat bestetik norbera alfer samarra dela, etab... ba horixe, ogia okindegietan erosten.

Iazko uztailan interneten buelta batzuk ematen nebilela blog batera heldu nintzen. Irakurtzen hasi eta bapatean eskumako partean ikusten dut: "como hacer pan de verdad", gainean klikatu, irakurtzen hasi eta, halako baten "masa madre". Eta hori zer ostias dok? Irakurri eta, tachannn... hau da, nik behar dudana, argazki eta guztiz, jooooer!! Oporretara joan eta ezin burutik kendu ikusi nuena, oporretatik bueltatu eta ezin topatu orrialdea, hau marka. Ostia tio, hi tontua haiz!! pentsatu nuen ez nuela gorde konturatu nintzenean. Tontua ez, "tonto del culo", hori haiz hi. Aste bete bila ibili ondoren tachannn, hemen dago berriz ere, "gorde kapullo" eta gorde egin nuen. Irakurri eta, erraza ematen du pentsatzen nengoela, non konturatzen naizen esteka bat duela "muchas maneras de hacerla" izenarekin. Zabaldu, irakurri eta erabakia hartu. Hurrengo egunean zekale irin integrala, gari zuria eta mahatspasak erosi nituen, jogurta baneukan, "y manos a la obra".

Pausu guztiak, Ibanen blogean dauden bezala eman nituen. Benetako ogia jateko, lortzea nahi nuelako, prozesua ziurtatu. Lehenengo egunetan etxean nengoenean potoari begira egoten nintzan. Hirugarren edo laugarren egunean burbuilak ikusi nituenean hura ondo zihoala iruditu zitzaidan, a ze poza!! Aste betera eta bizirik zegoela ikusita, berriz "como hacer pan" zabaldu nuen eta guztiz animatuta, buru belarri, orea egiten jardun nintzen. Ordu batzuetara ogia eginda zegoen, etxean kriston usaina eta guk, ogi ogia (100%) jaten. Bai ogi-ogia, hortik blogaren izena. Ordutik ogi asko egin ditut, denak jangarriak. Batzuk beste batzuk baino dotoreagoak. Borobilak, luzeak, haundiak, txikiagoak, zekale, garia, etabar luze bat.

Oharra.- Gaur egun, elikatu galirin zuriarekin elikatzen dut. Arrazoia? Nere ustez legamia zuria bada, ogi zuria edo integrala egin dezakedalako baina, legamia integrala bada, ez. Integrala izanda, ogiak beti integral puntua edukiko du, neurri txiki baten bai behintzat. Hilean behin zekale integral pixkat botatzen diot asko gustatzen zaiolako, hummm!! eta indartu egiten delako.

Behin susto haundia hartu nuen nire legamia horrela zegoelako. Ogia egin behar nuen eta potoan zegoena ez zidan ematen inongo konfiantzarik. Bol batera atera eta berpiztea lortu nuen.

Hauek dira berpizteko jarraitutako pausuak:

Goiko likido ilun hori bota ondoren irabiatu egin nuen eta pototik 25 gr. bol batera atera nituen. Neurri horri, 75 gr. ur eta beste hainbeste galirin gehitu nizkion, irabiatu eta trapu batekin estali 12 ordutan horrela laga, noizbehinka (3-4) irabiatu. Kostata, baina azkenean burbuila batzuk ikusten zitzaizkion. 12 ordu pasatu ondoren *boletik 50 gr. pasatu nituen beste bol batera eta oraingoan 100 gr. ur eta beste hainbeste galirin gehitu nizkion, irabiatu eta estali. Noizbehinka (5-6) irabiatu, astiaren arabera. Hamabi ordu pasatu ondoren **horrela zegoen, ogia egiteko prest. Boletik 200 gr. ogia egiteko hartu eta beste 50 gr. potora bota eta hozkailura sartu. 200 gr. hoiekin ogi hau egin nuen.

*Lehenengo boletik bigarrenera 50 gr. pasatu ondoren, lehenengoan 125 gr. geratu ziren eta hoiekin hau egin nuen. Argiñañok esaten duen moduan, sukaldean dena aprobetxatu behar da.

** Kriston indarra zeukanez, potoan geratzen zitzaidan gauza ilun hura bota egin nuen.

Ogia egitera noanean, legamia nola aktibatzen dudan:

Berpiztu nuenetik oso legami gutxi daukat hozkailuan, 50 gr. asko jota. Ogia egitera noanean, pototik bolera 20 gr. ateratzen ditut eta neurri horri 40 gr. ur eta beste hainbeste irin gehitzen dizkiot, irabiatu eta estali. Laga horrela 12 ordu, noizbehinka astiaren arabera, irabiatu. Orain, neurri hau daukagu: 20+40+40= 100 gr.

12 ordu pasatu ondoren, 100 gr. hoiei 200 gr. ur eta beste hainbeste irin gehitu, irabiatu eta estali. Laga horrela beste 12 ordutan, noizbehinka irabiatu. Momentuan 100+200+200= 500 gr. ditugu. Neurri honekin, kiloko 2 ogi egin ditzakegu eta sobratzen zaiguna potora.

Beste era batera esanda, 2 ogi egitera banoa, badakit 400gr. legami behar ditudala baina, beti pixkat gehiago egiten dut zerbait gordetzeko. Hasteko, totala zati 25 egingo dut beraz, 500:25=20gr.

Hasierako neurriari, ura eta irina bikoiztuta botako diot, 20 dudanez 40+40=100. Momento honetan totala 100 da, berriz ura eta irina bikoiztu egingo dizkiot beraz, 200+200=500 gr.

Zenbat eta sarriago elikatu, ogiak azido-puntua txikiagoa izango du. Bi aldiz elikatzen badugu, ogiak azido-puntu gutxiago edukiko du behin elikatuta baino. Sarritan, etxerako behin elikatzen dut azido-puntu hori atsegin dugulako baina lagunentzat egiten dudanean bi eta hiru bider ere elikatzen dut. Ulertzen al da?

Oharra.- Niretzat legami naturala egitea ez zen batere zaila izan. Ogia egitea ere ez. Hasi baino lehenago oso argi eduki behar dena zera da, denbora eta pazientzia behar direla. Kontutan izan orea egiten denetik, ogia labetik atera orduko 7 ordu inguru pasatzen direla. Orea egin ondoren astia ez badugu, hozkailua kriston asmakizuna da. Nik, 3 egunetan eduki izan dut. Gure etxean, urritik, gogor eta txikle bezala geratzen diren ogi hoiek ez dira sartu eta ez dira sartuko!!

Irakurri ondoren norbaitek zalantzak baditu, galdetu lasai asko. Edo idatzitako zerbaitekin ados ez badago esan.

Hau nire esperientzia pertsonala da besterik ez, baina neri momentuz ondo joan zait. Norbaitentzat lagungarria bada ba ... de la oxtia.

Animo, nik egin badut edozein egin dezake eta.

Musuak denontzat.

Ogia, Espelta askooorekin 2. partea.

2009-06-20T11:41:00.014+02:00

Ez dakit gogoratzen zareten baina, froga bat neukan egiteke. madridtienemiga blogeko kide batek behin, iruzkin bat bidali zidan non galdetzen ninduen zergatik egiten nuen ogia egiten nuen moduan eta ez beste era batera. Iruzkinean jartzen zidan horren zergatia. Klikatu estekaren gainean eta irakurri ahal izango duzue. Egin dut eta hemen emaitzak. Argazkiak ikustea besterik ez dago.

Goiko biak nire erara egindakoak dira eta beste biak berak esandako erara.

Lehen era honetan egiten nituen, kide horren iruzkina irakurri ondoren froga bat egin nuen berak esandako moduan. Baina froga, osagai berberekin egitea nahi nuen. Esan eta egin.

Era hontara egindakoa anitz gehiago harrotu zen. Horren ondorioz, mozterakoan askoz malguagoa da zalantzarik gabe. Eskuekin estutu eta xaflakorra da, oso. Ahoan sartu eta murtxikatzen hasten zarenean, nabaritzen da askoz samurragoa dela. Zaporean ez dago alde handirik eta iraupenean ere ez, jaja, biak oso onak baitzeunden. Aurrerantzean, zalantzarik gabe, berak esandako erara egingo ditut.

Mila esker.

Ogia, pizza puntuarekin.

2009-06-18T11:50:00.007+02:00

Hiru iloba ditut, bi Eibarren bertan eta bestea Antzuolan. Antzuolakoa ez dut behar beste ikusten baina Eibarkoak, sarritan. Ikusten nautenean (ez beti) galdetzen didate, tio noiz egin behar diguzu pizza? Hainbeste aldiz entzun ondoren ogi hauek egitea bururatu zitzaidan, osagai hauekin :

Galirin zuria 500 gr.
Ura 250 gr.
Legami naturala 200 gr.
Etxean egindako tomatea 75 gr.
Azukrea 6 gr.
Gatza 12 gr.
Albahaca eta oreganoa, gramo batera ez zen ailegatu.

Egin, ore bat egin nuen. Irina, azukrea, albaka eta oreganoa nahastu. Ura, tomatea eta legamia gehitu. Dena, ondo nahasi. Ordu erdi atsedena hartzen laga ondoren, gatza bota eta oratu. Oso arina zegoen eta dezente kostatu zitzaidan. Bertinet teknika erabiliz, berrogeita bost minutu inguru pasatu nituen, zatika, atsedena hartu zezan. Ikusi nuenean ondo zegoela (mintza -membrana- froga egin nion), olioarekin igurtzitako katillu baten sartu nuen. Hurrengo hiru ordutan 3 tolesdura eman nizkion. Bi zatitan moztu, forma eman eta bannetonetara beste pare bat ordu. Labea berotu, taxuak eman eta sartu. Irin zuria zenez lehenengo 20 minutuak 250-235 gradutara, lurrunarekin, eduki nituen. Ura atera, hurrengo 15 minutuak 235-200 gradutara eta azkenengo hamabostak 200-180 gradutara.
Horra hor atera zena.

Kriston kolore dotoria daukate, tomate puntua ez zaie asko (zeozer bai) nabaritzen baina, albaka eta oreganoarena bai. Pixkat umela dago eta fina. Asko gustatu zaigu eta pentsatzen ari naiz beharbada, hurrengoari gustoko pizza baten osagai guztiak jarriko dizkiodala. Gazta (feta) barruan zeukan, ogi bat janda daukat, orduan zergatik ez?

Redio!! Pozik nago, eta ez dakit nola esan. Aiaiaiaiaiaiaiaiaiaiaiaiaiaiaiaiaiaiaiaiaiajaijaijaijaijai!! Agian ez zarete konturatu baina, irrintzia izan da. Jeje.

Musuak.

Ogia, frogak frogak.

2009-06-16T16:45:00.016+02:00

Beno, ba hauxe da madridtienemiga blogean sartutako azkena, laugarrena. Izenburu hori, aurreko postean esan bezala hango batek, nik egindako galdera bati erantzun ondoren, froga bat egitea erabaki nuelako da. Ez daukat denbora askorik baina, arratsalde hartan ordu batzuk niretzat hartzea pentsatu nuen. Esan eta egin.

Hauek osagaiak:

Galirin zuria 350 gr.

Zekale integrala 150 gr.

Ura 275 gr.

Legami naturala 200 gr.

Gatza 12 gr.

Karamelu likidoa 6 gr.

Erromero apur bat (gramo batera ez zen ailegatu)

Lehenengo aldiz, erromeroa eta karamelu likidoa erabiltzen nituela. Erromeroa, ia ze ikutu ematen zion probatzeko eta karamelua, orea pixkat iluntzeko asmoarekin.

Hasi, beti bezala egin nuen, osagai guztiak nahastuz gatza ezik. Ordu erdiko egonaldia eta gatza bota nion. Ondoren lau minutu inguru oratu.

Eta hemen hasi zen niretzat froga zena. Dakizuenez oratu ondoren orea, hozkailuan sartzen nuen. Oraingo honetan, ez. Tolesdurak (3), hurrengo hiru ordutan egin nizkion eta jarraian hozkailura sartu nuen. Hurrengo egunean atera, giro-tenperatura hartzen laga ordu bete inguru, forma eman eta bannetonera ordu eta erdi. Labea berotu, taxuak eman eta sartu. Lehenengo 20 minutuak 225 gradutara lurrunarekin ondoren, ura atera eta 200 gradutara jaitsi. 15 minutu pasatu eta gero, labeko tenperatura 175 gradutan ipini, handik 15 minutura eginda zegoen.

Hasteko, erromeroak emandako ikutua oso atsegina iruditu zitzaidala esango dizuet. Karameluarekin nahi nuena ez nuen lortu, katxiiiis!! Gehiago bota behar nion, baina ez nintzen ausartu. Gerora, batzuk 40 gr. botatzen diotela enteratu naiz. Asko iruditzen zait, dena dela egunen batean beste froga bat egingo dut.

Frogari buruz zer? Ez nuen diferentzia askorik nabaritu, zerbait bai.

Ateratako konklusioak? Alde batetik, hozkailutik atera ondoren gobernatzea errazagoa egin zitzaidala. Bannetonean azkarrago eta gehiago harrotu zela, taxuak emateko erraztasun gehiago izan nuela. Puntu honetan eta beti egitura bera badu taxua ematerakoan, errekurtso gehiago izango ditudala . Argazkiak lekuko.
Labean ondo harrotu zela eta mamiak beste ogi batzuetan bezalako albeoloak (zuloak) ez zituela. Hala eta guztiz, nahiz eta irudietan konpaktoagoa ikusi oso oso samurra zegoela. Bai zegoen, janda dago eta. Hummmm!! jeje.

Esan beharra daukat froga oso oso positiboa izan zela. Hurrengo ogia aurreko ogiaren osagai berberekin egingo dudala eta uste dut diferentziak hor bai igarriko direla.

Hitz bitan esanda oso pozik nagoela, karajo!!

Hurrengo ogia, noiz izango ote da? Nork daki? Nik ez, behintzat. Je,je.

Oharra.- Pentsatzen ari naiz, eta hau ez da ohikoa je, je. Beharbada egunen baten, legami naturala, legami basatia, ama orea edo nahi duzuen izena eman, buruz idatziko dudala. Nire esperientzia noski. Nola egin nuen, nola berpiztu hilda zegoela pentsatu nuenean, nola elikatu, etab... Zer iruditzen zaizue? Erantzunak onartzen dira, e?

Musuak denontzat,

Juantxo

Ogia, Espelta askooorekin.

2009-06-15T21:56:00.008+02:00

Aurrekoan jarri dizuedan bezala, egun berean bi ore egin nituen eta bigarren hortatik ateratako ogia hauxe duzue:

Osagaiak:

Espelta zuria 300 gr.

Espelta erdi edo semi integrala 200 gr.

Ura 280 gr.

Legami naturala 200 gr.

Gatza15 gr.

Azukrea 8 gr.

Bestean bezalaxe irinak eta azukrea nahastu, ura eta legamia gehitu eta ondo nahasi. Laga ordu erditxo bat eta gatza bota. Bertinet teknika erabiliz, 12 minutu inguru oratu. Hozkailura sartu, hurrengo egunean atera eta 3 ordutan 3 tolesdura egin. Forma eman eta bannetonera sartu. Oraingo honetan harrotzen, 2 ordu eduki beharrean 1,5 ordu laga nuen.

Taxuak eman eta labera. Aurreko ogiaren denbora eta era berberak erabili nituen.

Horra hor mamiaren argazkia.

Ohartxo batzuk.

Irakurri duzuenez harrotzen, 2 ordu eduki beharrean 1,5 ordu eduki nuen. Hirugarren tolesdura eman nionean askoz bigunagoa zegoela iruditu zitzaidan. Kriston burbuila handiak zituen. Ordura arte beste egitura bat zeukan, oraketa erraza izan zen eta ez zen egon batere itsaskorra.

Zergatik aldaketa hau? Normala al da? Hartziduran (fermentazioan) pasatu nintzan?

Sentsazio hori eman zidalako denbora gutxiago laga nuen harrotzen, bai?

Tenperatura gehiago zegoelako ere izan zitekeen. Tenperatura zenbat eta altuagoa izan, harrotzen, denbora gutxiago beharko du. 25 gradu baldin badaude, 20 gradurekin baino arinago harrotuko da, ados? Baina, ez zen kasua.

Bannetonetik ateratzera joan nintzenean, itsatsita zegoen. Kristonak pasa nituen handik ateratzeko baina, lortu nuen. Beste hainbeste taxua (ebakidura) emateko orduan. Hortik itxura irregular hori. Zaporea, ezin hobea.

Hor egindako galdera berberak egin nizkien madridtienemigakoei, erantzun posible dexente eman zizkidaten baina, batekin geratu nintzen. Asko pentsatu ondoren eta oraingoan, asko izan zen je,je. hurrengo ogia desberdin egitea erabaki nuen. Nola? Hori hurrengo ogia argitaratzen dudanean ikusi/irakurriko duzue. Bien bitartean ondo segi, ederrok.

Juantxo

Ogia, zekale zuriarekin.

2009-06-15T19:35:00.005+02:00

Normalean, ez dut izaten denbora askorik eta dudanean bi, hiru eta batzuetan lau ore egiteko aprobetxatzen dut. Kasu honetan bi egin nituen, hau eta hurrengoa. Ogia egiteko modu honek (legami naturala), denbora behar duelako. Legami naturala hozkailuan edukitzen dut, erdi lo (ni bezala). Ogia egin behar dudanean atera, giro-tenperatura hartzen laga eta elikatu. Orea egin baino 24 ordu lehenago hasten naiz elikatzen, hau da, ostiralean arratsaldeko 7etan egiteko asmoa baldin badut ostegunean 7etan hasi. Bi kasu hauetan horrela izan zen.

Osagaiak:

Galirin zuria 325 gr.

Zekale zuria 175 gr.

Ura 300 gr.

Legami naturala 160 gr.

Gatza 13 gr.

Azukrea 3 gr.

Irinak eta azukrea nahastu nituen, ura eta legami naturala gehitu eta dena ondo nahasi. Ordu erdi deskantsatzen laga eta gatza bota nion. Ondoren, 4 minutu inguru oratu. Zekalea duenez asko itsatzen da beraz, pazientziaz hartu, ados? Eskuak bustita izatea asko laguntzen du.

Orea, hozkailura sartu olioz igurtzitako bol edo katilu baten eta bertan laga. Hurrengo egunean atera eta 3 ordutan 3 tolesdura egin. Forma eman eta bannetonean beste pare bat ordu laga, harrotzen.

Labea berotu, taxuak eman eta bertara sartu. Lehenengo 20 minutuak 225 gradutara lurrunarekin, ondoren ura atera eta 200 gradutara jaitsi. 20 minutu pasatu eta gero, labeko tenperatura 180 gradutan ipini, handik 10 minutara eginda dago. Bestela badakizue, popan ukitu batzuk eman.

Eta ikusten duzuena da, atera zena.

Orain arte gatza, hasieran jartzen nion irina eta azukrearekin batera baina, madridtienemiga eta bonsfocs blogetan, deskantsatu ondoren botatzea hobe zela irakurri nuenez ba, orain horrela egiten ditut.

On egiiiiiin.

Juantxo

Estreinaldi Ogia.

2009-06-15T09:16:00.005+02:00

Esandakoa betetzen, horra hor lehenengoa.

Beno, ez da egiten dudan lehenengo ogia baina, bai argitaratzen dudan lehenengoa, hortik izenburua (originala,ez?) jeje. Ez daukat oso argi nondik hasi baina, buruari buelta batzuk eman ondoren (asko ez) nire legami naturala aurkeztuko dizuet eta hauxe da, tachaannn:

Ederra, e?
Eta hau, ogia.
Hauexek dituzue osagaiak:
Espelta irin zuria 200 gr.
Gari irina 300 gr.
Ura 260 gr. inguru
Legami Naturala 200 gr. (zurituta)
Gatza 13 gr.
Azukrea 3 gr.

Bertinet teknika erabiliz, 10-12 minutu inguru oratu nuen. Larunbat gau osoa hozkailuan igaro ondoren, igandean goizean goiz atera eta, 3-3,5 ordutan hiru tolesdura egin nizkion. Forma eman eta bannetonean beste 2,5 ordu inguru harrotzen. Labean 250 gradutan lurrunarekin 20 minutu inguru eduki eta gero, ura kendu eta tenperatura 225 gradutara jaitsi, 15 minutu pasatu ondoren eta kolorea hartzen ari zela iruditu zitzaidanez, tenperatura 200 gradutara jaitsi nion eginda egon arte. Eginda dagoen edo ez jakitzeko, popan ukitu batzuak eman eta hutsik dagoela ematen badu, eginda dagoen seinale da. Guztira 45-50 minutu inguru.

Ikusten duzuenez neurri eta denbora batzuk gutxi gorabehera jartzen dizkizuet, garai hartan pixkat anarko nintzelako. Pare bat argazki detaileekin eta zuen iruzkinen zai geratzen naiz.

Oharra.- Beharbada erabiltzen dudan terminologia ez da erraz ulertzen, zalantzaren bat izanez gero galdetu eta ahal dudan neurrian erantzungo dizuet, ados?

On egin eta hurrengoan gehiago, fale?

Juantxo

Oharra edo azalpena.

2009-06-14T18:30:00.011+02:00

Aurkezpena eta ongi etorria ondoren lehenengo posta doakizue. Lehenengo honekin esan nahi dizuet argitaratuko ditudan hurrengo lau errezetak, madridtienemiga.wordpress.com blogean argitaratu nituela. Maiatzak 14ean, Estreinaldi Ogia izenburuarekin lehenengoa. Bigarrena, maiatzak 24ean Ogia, Zekale zuriarekin. Hirugarrena, maiatzak 28an Ogia, Espelta askooorekin eta laugarrena ekainaren 3an Ogia, frogak egiten. Asmoa, eta beti astia baldin badaukat, lau hauek hurrengo egunetan argitaratzea da. Bai ez, bai ez, .... Ikusiko dugu, jeje.

Onak izan,
Juantxo

Aurkezpena eta Ongietorria - Presentación y Bienvenida.

2009-06-09T19:24:00.007+02:00

Beno, azkenean animatu naiz eta nire bloga sortu dut. Juantxo dut izena, Eibartarra naiz eta nire hezurrak mende erdia daukate (ufa). Izenburuan irakurri daitekenez, momentuz behintzat, ogiaren inguruan idatziko dizuet. Horrek, ez du nahi esaterik beti horrela izango denik. Gaurko azalpena elebidun doakizue baina, aurrerantzean denak euskeraz izango dira. Gazteleraz ere jarraituko dut idazten madridtienemiga.wordpress.com blogean. Zuen iruzkinak edozein hizkuntzatan bidali ditzakezue, beti euskera edo gaztelerara itzulita, hizkuntza bi hoietan erantzungo baitizuet (besterik ez baitakit).

Beraz, ongi etorriak izan blogera.

Por fin me he animado y he creado mi propio blog. Me llamo Juantxo, soy de Eibar -Gipuzkoa- y mis huesos ya cantan medio siglo (casi ná). Como podéis adivinar por el encabezamiento escribiré, al menos de momento, en torno al pan. Esto no quiere decir que siempre vaya a ser así. La presentación es bilingüe pero, en adelante todas las entradas irán en euskera. Seguire, publicandolas en castellano igual que hasta ahora, en madridtienemiga.wordpress.com Podeis enviar vuestros comentarios en cualquier idioma, siempre traducidos al euskera o castellano y os contestaré en uno de ellos (es que no sé ninguno mas).

Sed pues, bienvenid@s al blog.

Besarkada bat
Un abrazo
Juantxo